ហ្ស៊កដានី និងសហភាពអឺរ៉ុប (EU) បានចេញសេចក្តីថ្លែងការណ៍រួមមួយកាលពីថ្ងៃព្រហស្បតិ៍ បន្ទាប់ពីកិច្ចប្រជុំកំពូលហ្ស៊កដានី-សហភាពអឺរ៉ុបលើកដំបូង ដែលបានធ្វើឡើង នៅវិមាន Al Husseiniya Palace នៃរដ្ឋធានីអាម៉ាន ដែលពួកគេបានជំរុញឲ្យមានការពង្រីកលទ្ធភាពរបស់ក្រុមមនុស្សធម៌ចូលទៅដល់តំបន់ហ្កាហ្សា និងបានបញ្ជាក់ជាថ្មីនូវការគាំទ្រចំពោះដំណោះស្រាយរដ្ឋពីរ។

យោងតាមសេចក្តីថ្លែងការណ៍រួមបានឲ្យដឹងថា ភាគីទាំងពីរបានជំរុញឲ្យគ្រប់ភាគីទាំងអស់អនុវត្តសេចក្តីសម្រេចលេខ ២៨០៣ របស់ក្រុមប្រឹក្សាសន្តិសុខអង្គការសហប្រជាជាតិ និងសម្រួលដល់ការផ្តល់ជំនួយយ៉ាងឆាប់រហ័ស សុវត្ថិភាព និងគ្មានការរារាំងនៅទូទាំងតំបន់ហ្កាហ្សា។

ពួកគេក៏បានអំពាវនាវឲ្យអ៊ីស្រាអែលបញ្ចេញប្រាក់ចំណូលពន្ធរបស់ប៉ាឡេស្ទីនដែលត្រូវកាត់ទុក ដើម្បីធានាបាននូវដំណើរការរបស់អាជ្ញាធរប៉ាឡេស្ទីន។ នេះបើយោងតាមសេចក្តីថ្លែងការណ៍។

ពួកគេបានសម្តែងការព្រួយបារម្ភយ៉ាងខ្លាំងចំពោះស្ថានភាពនៅតំបន់វេសបែង រួមទាំងក្រុងហ្ស៊េរុយសាឡឹមខាងកើត និងបានថ្កោលទោសយ៉ាងដាច់អហង្ការចំពោះការពង្រីកការតាំងទីលំនៅ ការប៉ុនប៉ងដាក់បញ្ចូលផ្នែកណាមួយជាឧបសម្ព័ន្ធ និងអំពើហិង្សាប្រឆាំងនឹងជនស៊ីវិល។

សេចក្តីថ្លែងការណ៍បានបញ្ជាក់ថា ចំពោះបញ្ហាតំបន់ផ្សេងទៀត ភាគីទាំងពីរបានសង្កត់ធ្ងន់លើការគោរពអធិបតេយ្យភាព និងបូរណភាពទឹកដីរបស់ប្រទេសលីបង់ និងបានអំពាវនាវឲ្យមានការអនុវត្តពេញលេញនូវសេចក្តីសម្រេចលេខ ១៧០១ របស់អង្គការសហប្រជាជាតិ និងបទឈប់បាញ់ឆ្នាំ ២០២៤។ ពួកគេក៏បានសន្យាធ្វើកិច្ចសហប្រតិបត្តិការ ដើម្បីគាំទ្រដល់ស្ថិរភាព ការកសាងឡើងវិញ និងការវិលត្រឡប់របស់ជនភៀសខ្លួន នៅក្នុងប្រទេសស៊ីរី៕