រដ្ឋមន្ត្រីការបរទេសទួរគី លោក Hakan Fidan កាលពីថ្ងៃព្រហស្បតិ៍ បានចោទប្រកាន់កងកម្លាំងប្រជាធិបតេយ្យស៊ីរី (SDF) ដែលដឹកនាំដោយឃើដថា បានបង្កអន្តរាយដល់ស្ថិរភាពរបស់ប្រទេសស៊ីរី និងសម្របសម្រួលជាមួយអ៊ីស្រាអែល ខណៈដែលអំពើហិង្សាបានបន្តកើតឡើង នៅទីក្រុងអាឡេប៉ូ ភាគខាងជើងប្រទេសស៊ីរី។

លោក Fidan បានថ្លែងនៅក្នុងសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសអូម៉ង់ លោក Sayyid Badr bin Hamad Al Busaidi ដែលកំពុងមកធ្វើទស្សនកិច្ចថា៖«ការទទូចរបស់កងកម្លាំងប្រជាធិបតេយ្យស៊ីរី (SDF) ក្នុងការរក្សាស្ថានភាពដើម គឺជាឧបសគ្គសំខាន់បំផុតចំពោះផាសុកភាព និងស្ថិរភាពរបស់ប្រទេសស៊ីរី»។

លោក Fidan បាននិយាយថា ការវិវត្តថ្មីៗនៅក្នុងទីក្រុងអាឡេប៉ូមានទំនាក់ទំនងដោយផ្ទាល់ទៅនឹងសន្តិសុខជាតិរបស់ប្រទេសទួរគី។ លោកបានបន្ថែមថា ទីក្រុងអង់ការ៉ាកំពុងសម្របសម្រួលជាមួយភាគីពាក់ព័ន្ធទាំងអស់។ ក្រសួងការបរទេសក៏បានចោទប្រកាន់ SDF ថា បានបម្រើជា «ឧបករណ៍សម្រាប់គោលនយោបាយ «បែងចែក និងគ្រប់គ្រង» របស់អ៊ីស្រាអែល ដោយសម្របសម្រួលជាមួយអ៊ីស្រាអែល»។

ទួរគីចាត់ទុក SDF ដែលគាំទ្រដោយសហរដ្ឋអាមេរិក ដែលគ្រប់គ្រងផ្នែកធំៗនៅភាគឦសាននៃប្រទេស   ស៊ីរី ជាអង្គការភេរវកម្ម។ ទីក្រុងអង់ការ៉ានិយាយថា SDF ត្រូវបានគ្រប់គ្រងដោយអង្គភាពការពារប្រជាជនឃើដ (YPG) ដែលជាផ្នែកបន្ថែមនៃគណបក្សពលករឃើដ (PKK) ដែលបានធ្វើយុទ្ធនាការប្រដាប់អាវុធប្រឆាំងនឹងរដ្ឋទួរគី ចាប់តាំងពីឆ្នាំ ១៩៨៤៕