ប្រទេសជាង ២០ បានបញ្ជាក់ជាថ្មីនូវអធិបតេយ្យភាពរបស់ប្រទេសសូម៉ាលី និងបានថ្កោលទោសចំពោះដំណើរទស្សនកិច្ចថ្មីៗនេះរបស់រដ្ឋមន្ត្រីការបរទេសអ៊ីស្រាអែលទៅកាន់ដែនដីសូម៉ាលីឡែន (Somaliland) ដែលជាតំបន់បំបែកខ្លួនរបស់ប្រទេសសូម៉ាលី។ នេះបើយោងតាមសេចក្តីថ្លែងការណ៍រួមដែលចេញផ្សាយនៅព្រឹកថ្ងៃសុក្រនេះ។

ប្រទេសទាំងនោះ បានបដិសេធការទទួលស្គាល់របស់អ៊ីស្រាអែលចំពោះដែនដីសូម៉ាលីឡែន ជារដ្ឋឯករាជ្យ បានបញ្ជាក់ជាថ្មីនូវបូរណភាពទឹកដីរបស់ប្រទេសសូម៉ាលី និងបានជំរុញឲ្យអ៊ីស្រាអែលលុបចោលការទទួលស្គាល់របស់ខ្លួនចំពោះសូម៉ាលីឡែនជាបន្ទាន់។

ប្រទេសចំនួន ២១ រួមមាន អារ៉ាប៊ីសាអ៊ូឌីត អាល់ហ្សេរី បង់ក្លាដែស កូម៉ូរ៉ូស ជីប៊ូទី អេហ្ស៊ីប ហ្គាំប៊ី ឥណ្ឌូនេស៊ី អ៊ីរ៉ង់ ហ្ស៊កដានី គុយវ៉ែត លីប៊ី ម៉ាល់ឌីវ នីហ្សេរីយ៉ា អូម៉ង់ ប៉ាគីស្ថាន ប៉ាឡេស្ទីន កាតា សូម៉ាលី ស៊ូដង់ និងទួរគី។ អង្គការសហប្រតិបត្តិការឥស្លាម ដែលជាស្ថាប័នអន្តរជាតិមួយដែលតំណាងឲ្យប្រទេសភាគច្រើនដែលមានប្រជាជនមូស្លីម ក៏បានគាំទ្រសេចក្តីថ្លែងការណ៍នេះផងដែរ។

ប្រទេសទាំងអស់នេះ បានថ្កោលទោសចំពោះដំណើរទស្សនកិច្ចរបស់រដ្ឋមន្ត្រីការបរទេសអ៊ីស្រាអែល លោក Gideon Saar ទៅកាន់ដែនដីសូម៉ាលីឡែនកាលពីថ្ងៃអង្គារ រយៈពេលប៉ុន្មានថ្ងៃបន្ទាប់ពីអ៊ីស្រាអែល បានក្លាយជាប្រទេសតែមួយគត់ ដែលទទួលស្គាល់ជាផ្លូវការនូវតំបន់បំបែកខ្លួនរបស់ប្រទេសសូម៉ាលី៕