អភិបាលក្រុងគីវបាននិយាយនៅថ្ងៃសុក្រនេះថា ការវាយប្រហាររបស់រុស្ស៊ីលើរដ្ឋធានី និងតំបន់ជាយក្រុងរបស់អ៊ុយក្រែន បានសម្លាប់មនុស្សយ៉ាងហោចណាស់ បីនាក់ ខណៈដែលកងទ័ពអាកាសបានចេញការព្រមានពីការវាយប្រហារដោយមីស៊ីលទូទាំងប្រទេស។

លោក Vitali Klitschko អភិបាលក្រុងគីវបានបង្ហោះនៅលើបណ្តាញ Telegram ថា៖«មនុស្ស បីនាក់ បានស្លាប់ នៅក្នុងរដ្ឋធានីនេះ។ មនុស្ស ៦នាក់ បានរងរបួស ដោយបីនាក់ក្នុងចំណោមពួកគេ ត្រូវបានបញ្ជូនទៅមន្ទីរពេទ្យ»។

អភិបាលតំបន់លោក Mykola Kalashnyk បានជំរុញឲ្យប្រជាជនស្នាក់នៅក្នុងជម្រក រហូតដល់សំឡេងស៊ីរ៉ែនវាយប្រហារតាមអាកាស រលត់។

កងទ័ពអាកាសអ៊ុយក្រែន បានព្រមានថា៖«អ៊ុយក្រែនទាំងមូលស្ថិតនៅក្រោមការគំរាមកំហែងដោយ         មីស៊ីល» បន្ទាប់ពីបានបញ្ជាក់ថា យន្តហោះទម្លាក់គ្រាប់បែករបស់រុស្ស៊ី បានហោះឡើងលើអាកាស។

នៅទីក្រុង Lviv ភាគខាងលិច លោកអភិបាលក្រុងនេះ បាននិយាយថា៖«ហេដ្ឋារចនាសម្ព័ន្ធសំខាន់ៗ» ត្រូវបានវាយប្រហារ។

លោកអភិបាលក្រុង Andriy Sadovy បាននិយាយថា៖«សេវាកម្មពាក់ព័ន្ធទាំងអស់ កំពុងធ្វើការនៅ       លើទីតាំងនោះ ហើយអគ្គិភ័យកំពុងត្រូវបានពន្លត់»។

ការវាយប្រហារចុងក្រោយនេះ បានកើតឡើង បន្ទាប់ពីស្ថានទូតសហរដ្ឋអាមេរិកនៅទីក្រុងគីវ បានព្រមានកាលពីថ្ងៃព្រហស្បតិ៍ថា៖«ការវាយប្រហារតាមអាកាសដ៏សំខាន់ អាចកើតឡើង នៅពេលណាមួយ ក្នុង        រយៈពេលប៉ុន្មានថ្ងៃខាងមុខ»៕