ប្រធានាធិបតីកាមេរូន លោក Paul Biya កាលពីថ្ងៃព្រហស្បតិ៍ បានព្រមានថា វិបត្តិ និងជម្លោះដែលកំពុងកើនឡើងទូទាំងពិភពលោក បង្កការគំរាមកំហែងយ៉ាងធ្ងន់ធ្ងរដល់ប្រព័ន្ធអន្តរជាតិដែលមានស្រាប់។

លោក Biya បានថ្លែងក្នុងពិធីប្រពៃណីប្រចាំឆ្នាំមួយ ដែលមន្ត្រីរដ្ឋាភិបាលជាន់ខ្ពស់ និងសមាជិកនៃក្រុមការទូត បានជួបជុំគ្នា ដើម្បីផ្លាស់ប្តូរការសួរសុខទុក្ខឆ្នាំថ្មីថា៖«ទោះបីជាមានកិច្ចខិតខំប្រឹងប្រែងដ៏គួរឲ្យ សរសើរពីសហគមន៍អន្តរជាតិក៏ដោយ ពិភពលោករបស់យើង នៅតែស្ថិតនៅក្រោមការវាយប្រហារភេរវកម្ម ការរំលោភបំពានជាច្រើនលើអធិបតេយ្យភាពរដ្ឋ និងការធ្លាក់ចុះនៃច្បាប់អន្តរជាតិ»។

លោកបាននិយាយថា៖«ប្រសិនបើយើងបន្តដើរតាមផ្លូវនេះ មានហេតុផលគ្រប់បែបយ៉ាងដែលត្រូវព្រួយបារម្ភថា ប្រព័ន្ធអន្តរជាតិ ដែលយើងបានចំណាយពេលវេលា និងការខិតខំប្រឹងប្រែងជាច្រើន ក្នុងការកសាងនោះ នឹងដួលរលំនៅទីបំផុត»។

លោកបានសង្កត់ធ្ងន់លើសារៈសំខាន់នៃការដោះស្រាយជម្លោះតាមរយៈការសន្ទនា និងការផ្សះផ្សា ដោយជំរុញឲ្យសហគមន៍អន្តរជាតិពង្រឹងតួនាទីរបស់អង្គការសហប្រជាជាតិ ក្នុងការដោះស្រាយវិបត្តិនានា៕