អ៊ីស្រាអែលបាននិយាយថា កិច្ចខិតខំប្រឹងប្រែងរបស់លីបង់ក្នុងការដកហូតអាវុធពីក្រុមហេសបូឡា គឺមិនគ្រប់គ្រាន់ទេ បន្ទាប់ពីកងទ័ពលីបង់បានប្រកាសថា ខ្លួនបានបង្កើតការគ្រប់គ្រងប្រតិបត្តិការនៅភាគខាងត្បូង ដែលបង្កើនសម្ពាធលើមេដឹកនាំលីបង់ដែលខ្លាចថា អ៊ីស្រាអែលអាចបង្កើនការវាយប្រហារ។

ស្របតាមការទាមទាររបស់សហរដ្ឋអាមេរិក រដ្ឋាភិបាលលីបង់បាននិងកំពុងស្វែងរកការរឹតបន្តឹងការកាន់កាប់អាវុធចំពោះការគ្រប់គ្រងរបស់រដ្ឋ ចាប់តាំងពីក្រុមហេសបូឡានៅលីបង់ដែលគាំទ្រដោយអ៊ីរ៉ង់ បានលេចចេញជារូបរាងចុះខ្សោយយ៉ាងខ្លាំងពីសង្គ្រាមជាមួយអ៊ីស្រាអែល ក្នុងឆ្នាំ ២០២៤។

កងទ័ពលីបង់បាននិយាយកាលពីថ្ងៃព្រហស្បតិ៍ថា គោលដៅនៃដំណាក់កាលដំបូងនៃផែនការរបស់ខ្លួន ត្រូវបានសម្រេចតាមរបៀប «មានប្រសិទ្ធភាព និងជាក់ស្តែង» ហើយថា ខ្លួនបានធានាសុវត្ថិភាពតំបន់ក្រោមអំណាចរបស់ខ្លួន នៅភាគខាងត្បូងនៃទន្លេ Litani ដោយមិនរាប់បញ្ចូលទីតាំងដែលនៅតែកាន់កាប់ដោយកងកម្លាំងអ៊ីស្រាអែលទេ។

បន្ទាប់ពីសេចក្តីថ្លែងការណ៍របស់កងទ័ព ការិយាល័យរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា ក្រុមហេសបូឡាត្រូវតែដកហូតអាវុធទាំងស្រុង ដោយលើកឡើងពីបទឈប់បាញ់ដែលសម្របសម្រួលដោយសហរដ្ឋអាមេរិកជាមួយប្រទេសលីបង់ ក្នុងខែវិច្ឆិកា ឆ្នាំ២០២៤៕