អ្នកនាំពាក្យស្ថានទូតចិនប្រចាំសហរដ្ឋអាមេរិក លោក Liu Pengyu បានប្រាប់សារព័ត៌មាន TASSថា ការទាមទាររបស់សហរដ្ឋអាមេរិកទាក់ទងនឹងការចូលរួមរបស់ប្រទេសចិនក្នុងការពិគ្រោះយោបល់លើការកាត់បន្ថយឃ្លាំងអាវុធនុយក្លេអ៊ែរ គឺមិនសមហេតុផល និងបែកចេញពីការពិត ដោយធ្វើអត្ថាធិប្បាយអំពីការលើកឡើងរបស់ប្រធានាធិបតីអាមេរិក លោក ដូណាល់ ត្រាំ ថា តាមទស្សនៈរបស់លោក ប្រទេសចិនគួរតែត្រូវបានរួមបញ្ចូលជាមួយរុស្ស៊ី និងសហរដ្ឋអាមេរិក នៅក្នុងកិច្ចព្រមព្រៀងនាពេលអនាគតដែលអាចកើតមានលើការគ្រប់គ្រងអាវុធនុយក្លេអ៊ែរ។

លោកបាននិយាយថា៖«យើងបានកត់សម្គាល់របាយការណ៍ពាក់ព័ន្ធ។

ប្រទេសដែលមានអាវុធនុយក្លេអ៊ែរច្រើនជាងគេរបស់ពិភពលោក គួរតែបំពេញការទទួលខុសត្រូវពិសេស និងចម្បងរបស់ខ្លួនចំពោះការរំសាយអាវុធនុយក្លេអ៊ែរ ធ្វើការកាត់បន្ថយឲ្យច្រើន និងសំខាន់ចំពោះឃ្លាំងអាវុធនុយក្លេអ៊ែររបស់ខ្លួន និងបង្កើតលក្ខខណ្ឌសម្រាប់ការសម្រេចបានចុងក្រោយនៃការរំសាយអាវុធនុយក្លេអ៊ែរពេញលេញនិងហ្មត់ចត់»។ 

អ្នកការទូតរូបនេះ បានបន្ថែមថា៖«កម្លាំងនុយក្លេអ៊ែររបស់ប្រទេសចិន មិនមានកម្រិតដូចគ្នាជាមួយសហរដ្ឋអាមេរិកទេ។ គោលនយោបាយនុយក្លេអ៊ែរ និងបរិយាកាសសន្តិសុខយុទ្ធសាស្ត្ររបស់យើង ក៏ខុសគ្នាទាំងស្រុងដែរ។ ដូច្នេះ ពុំសមហេតុផល ឬប្រាកដនិយមទេ ក្នុងការស្នើសុំឲ្យប្រទេសចិនចូលរួមក្នុងការចរចារំសាយអាវុធនុយក្លេអ៊ែរជាមួយសហរដ្ឋអាមេរិក និងរុស្ស៊ីនោះ»៕