នៅក្នុងបទសម្ភាសន៍រយៈពេលពីរម៉ោងជាមួយកាសែត New York Times នៅថ្ងៃទី៧ ខែមករា កន្លងទៅ លោកប្រធានាធិបតីអាមេរិក Donald Trump បានបង្ហើបឡើងថា «អាចជាការជ្រើសរើសមួយ» សម្រាប់សហរដ្ឋអាមេរិក រវាងការបន្តធ្វើតាមមហិច្ឆតារបស់លោកក្នុងលើកោះហ្គ្រីនលែន (Greenland) និងការរក្សាអង្គការណាតូ ឱ្យនៅដដែល។

អ្នកសម្ភាសន៍បានសាកសួរលោក Trump ថា តើការទទួលបានកោះហ្រ្គីនលែន ពិតជាសំខាន់សម្រាប់លោក ជាងការថែរក្សាសម្ព័ន្ធយោធាអាយុកាល ៧៦ឆ្នាំនេះ ឬយ៉ាងណា។ លោក Trump មិនឆ្លើយសំណួរចំៗទេ ប៉ុន្តែបានទទួលស្គាល់ថា រដ្ឋបាលរបស់លោក ប្រហែលជាត្រូវជ្រើសរើសរវាងចំណុចពីរនេះ នេះបើយោងកិច្ចសន្ទនាដែល New York Times បានចេញផ្សាយនៅសប្ដាហ៍នេះ។

ជម្រើសទាំងពីរនេះគឺជាសំណួរដ៏សំខាន់មួយ ដែលមានភាពបន្ទាន់កាន់តែខ្លាំងឡើងសម្រាប់សម្ព័ន្ធមិត្តអឺរ៉ុប របស់អាមេរិក ក្នុងពេលប៉ុន្មានថ្ងៃថ្មីៗនេះ ខណៈដែលលោក Trump និងសហការីរបស់លោក បានបង្កើនវោហាសាស្ត្រពីការក្រសោបយកកោះហ្រ្គីនលែន ដែលជាទឹកដីស្វ័យគ្រប់គ្រងរបស់ដាណឺម៉ាក។

នាយករដ្ឋមន្ត្រីដាណឺម៉ាក លោកស្រី Mette Frederiksen បានព្រមាននៅថ្ងៃទី៥ ខែមករាថា សកម្មភាពរបស់អាមេរិក លើកោះហ្រ្គីនលែន នឹងក្លាយជាទីបញ្ចប់នៃសម្ព័ន្ធយោធា។ ប្រធានាធិបតីបារាំង លោក Emmanuel Macron នៅក្នុងសុន្ទរកថាគោលនយោបាយការបរទេសប្រចាំឆ្នាំកាលពីថ្ងៃព្រហស្បតិ៍សប្ដាហ៍នេះ ក៏បាននិយាយផងដែរថា ទីក្រុងវ៉ាស៊ីនតោន កំពុង «ងាកចេញពីសម្ព័ន្ធមិត្តមួយចំនួនរបស់ខ្លួនជាបណ្ដើរៗទៅហើយ»៕