យោងតាមសុន្ទរកថាដែលចេញផ្សាយកាលពីថ្ងៃព្រហស្បតិ៍ (៨ មករា) បានឱ្យដឹងថា ប្រធានាធិបតីអាមេរិក លោក Donald Trump បានបង្ហើបថា លោកនឹងបណ្ដោយឱ្យសន្ធិសញ្ញាគ្រប់គ្រងអាវុធយុទ្ធសាស្ត្រចុងក្រោយ ឈ្មោះថា New START រវាងអាមេរិក និងរុស្ស៊ី ផុតកំណត់នៅខែកុម្ភៈ ខាងមុខនេះ ដោយមិនទទួលយកសំណើផ្តល់ជូនពីទីក្រុងមូស្គូ ដើម្បីពង្រីកដែនកំណត់ លើកិច្ចព្រមព្រៀងទប់ស្កាត់ការដាក់ពង្រាយអាវុធនុយក្លេអ៊ែរដ៏មានឥទ្ធិពលបំផុតរបស់ពិភពលោកនេះឡើយ។

នៅក្នុងបទសម្ភាសន៍មួយដែលលោកបានផ្តល់ឱ្យកាសែត New York Times លោក Trump បាននិយាយសំដៅលើកិច្ចព្រមព្រៀង New START ឆ្នាំ២០១០ នោះថា “បើផុតកំណត់ ក៏ផុតទៅ” ដោយបន្ថែមថា ទីក្រុងវ៉ាស៊ីនតោននឹងធ្វើកិច្ចព្រមព្រៀងកាន់តែប្រសើរជាងនេះ។

កិច្ចព្រមព្រៀងនេះដាក់កំហិតសហរដ្ឋអាមេរិក និងរុស្ស៊ី មិនឱ្យពង្រាយក្បាលគ្រាប់នុយក្លេអ៊ែរលើសពី ១.៥៥០គ្រាប់ឡើយ លើយានដឹកជញ្ជូនចំនួន ៧០០គ្រឿង - គិតទាំងមីស៊ីល យន្តហោះទម្លាក់គ្រាប់បែក និងនាវាមុជទឹក។

អ្នកតស៊ូមតិខាងគ្រប់គ្រងអាវុធ មានការភ័យខ្លាចថា មហាអំណាចនុយក្លេអ៊ែរធំជាងគេទាំងពីររបស់ពិភពលោកគឺអាមេរិក និងរុស្ស៊ី នឹងចាប់ផ្តើមដាក់ពង្រាយក្បាលគ្រាប់យុទ្ធសាស្ត្រលើសពីដែនកំណត់នៃកិច្ចព្រមព្រៀង បន្ទាប់ពីសន្ធិសញ្ញានេះផុតកំណត់នៅថ្ងៃទី៥ ខែកុម្ភៈ ខាងមុខ ដែលជំរុញឱ្យមានការសឹករិចរិលនៃរបបគ្រប់គ្រងអាវុធសកល៕