យោងតាមបទសម្ភាសន៍មួយរបស់សារព័ត៌មាន New York Times (NTY) ដែលបានចេញផ្សាយ កាលពីថ្ងៃព្រហស្បតិ៍ (ទី៨ ខែមករា ឆ្នាំ២០២៦) ប្រធានាធិបតីអាមេរិក លោក Donald Trump បាននិយាយថា «វាអាស្រ័យលើ» ប្រធានាធិបតីចិន លោក Xi Jinping ថា តើអ្វីដែលប្រទេសចិនចង់ធ្វើដាក់កោះតៃវ៉ាន់ ប៉ុន្តែលោកនឹងមិនសប្បាយចិត្តយ៉ាងខ្លាំង ប្រសិនបើមានការផ្លាស់ប្តូរស្ថានភាពជាក់ស្ដែងបច្ចុប្បន្ន។

លោក Trump បានប្រាប់សារព័ត៌មាននេះកាលពីថ្ងៃទី៧ ខែមករាថា៖ «គាត់ (លោក Xi) ចាត់ទុកថា វា (កោះ) ជាផ្នែកមួយរបស់ប្រទេសចិន ហើយនោះអាស្រ័យលើលោកថា តើអ្វីដែលលោកនឹងធ្វើចំពោះកោះនេះ។ ប៉ុន្តែខ្ញុំបានបង្ហាញទៅកាន់លោកថា ខ្ញុំនឹងមិនសប្បាយចិត្តយ៉ាងខ្លាំង ប្រសិនបើលោកធ្វើបែបនោះ ហើយខ្ញុំមិនគិតថា លោកនឹងធ្វើបែបនោះឡើយ។ មែនហើយ ខ្ញុំសង្ឃឹមថា លោកមិនធ្វើបែបនោះទេ»។

លោក Trump បានធ្វើការអត្ថាធិប្បាយនៅក្នុងបរិបទដែលលោក Xi អាចនឹងរៀនសូត្រពីប្រតិបត្តិការយោធារបស់លោក Trump នៅវ៉េណេស៊ុយអេឡា។ ប្រធានាធិបតីទៅពីគណបក្សសាធារណរដ្ឋរូបនេះ បានបញ្ជាក់ថា លោកមិនបានមើលឃើញស្ថានភាពទាំងនេះថា ស្រដៀងគ្នានោះទេ ពីព្រោះកោះតៃវ៉ាន់មិនបានបង្កការគំរាមកំហែងប្រភេទដូចគ្នា ចំពោះប្រទេសចិន ដែលលោកបាននិយាយថា រដ្ឋាភិបាលរបស់លោក Nicolas Maduro បានធ្វើចំពោះសហរដ្ឋអាមេរិក។

ជាមួយគ្នានេះ លោកក៏បានលើកឡើងម្តងទៀតនូវការជឿជាក់របស់លោក ដែលថា លោក Xi នឹងមិនចាត់វិធានការប្រឆាំងនឹងកោះតៃវ៉ាន់នោះឡើយ ក្នុងអំឡុងពេលលោកកាន់តំណែងប្រធានាធិបតី ដែលបញ្ចប់នៅឆ្នាំ២០២៩។

រដ្ឋបាលលោក Trump បានលើកឡើងនៅក្នុងឯកសារយុទ្ធសាស្ត្រមួយក្នុងឆ្នាំ២០២៥ ថា ខ្លួនមានគោលបំណងទប់ស្កាត់ជម្លោះជាមួយចិន ជុំវិញបញ្ហាតៃវ៉ាន់ និងសមុទ្រចិនខាងត្បូង ដោយការបង្កើនឥទ្ធិពលយោធារបស់សហរដ្ឋអាមេរិក និងសម្ព័ន្ធមិត្ត៕