រដ្ឋាភិបាលនៃប្រទេសទាំង២ បានប្រកាសឲ្យដឹងនៅថ្ងៃសុក្រ (ទី៩ ខែមករា ឆ្នាំ២០២៦) នេះថា ប្រធានាធិបតីកូរ៉េខាងត្បូង លោក Lee Jae-myung នឹងទៅបំពេញទស្សនកិច្ចនៅខេត្ត Nara ភាគខាងលិចប្រទេសជប៉ុនរយៈពេល ២ថ្ងៃ ចាប់ពីថ្ងៃអង្គារ (ទី១៣ ខែមករា ឆ្នាំ២០២៦)។

នៅថ្ងៃអង្គារនោះ លោក Lee នឹងជួបជាមួយនាយករដ្ឋមន្ត្រីជប៉ុន លោកស្រី Sanae Takaichi។ ដំណើរទស្សនកិច្ចនេះ គឺជាផ្នែកមួយនៃការទូត «ជាធម្មតា» របស់ប្រទេសទាំង២ ឬដំណើរទស្សនកិច្ចទៅវិញទៅមកដោយមេដឹកនាំរបស់ភាគីទាំង២ ហើយលោកស្រី Takaichi សង្ឃឹមថា នឹងកសាងទំនាក់ទំនងជាមួយមេដឹកនាំកូរ៉េខាងត្បូង ដោយស្វាគមន៍រូបលោកនៅខេត្តកំណើតរបស់លោកស្រី។

ទីក្រុងតូក្យូ កំពុងប្រឹងប្រែងពង្រឹងទំនាក់ទំនងជាមួយកូរ៉េខាងត្បូង ស្របពេលបរិយាកាសសន្តិសុខមានសភាពកាន់តែអាប់អួ នៅជុំវិញប្រទេសជប៉ុន ដោយចិន រុស្ស៊ី និងកូរ៉េខាងជើង កំពុងធ្វើឲ្យទំនាក់ទំនងរបស់ពួកគេកាន់តែស៊ីជម្រៅ។

នាយខុទ្ទកាល័យជប៉ុន លោក Minoru Kihara បានប្រាប់សន្និសីទសារព័ត៌មានមួយនៅថ្ងៃសុក្រនេះថា៖ «យើងជឿជាក់ថា មេដឹកនាំទាំង២ អាចពិភាក្សាដោយស្មោះត្រង់ លើការអភិវឌ្ឍបន្ថែមទៀតនូវទំនាក់ទំនងជប៉ុន-កូរ៉េខាងត្បូង»។

យោងតាមការប្រកាសរបស់រដ្ឋាភិបាលកូរ៉េខាងត្បូង លោក Lee នឹងទៅដល់ទីក្រុង Nara នៅរសៀលថ្ងៃអង្គារ។ នៅក្នុងកិច្ចប្រជុំកំពូលរបស់មេដឹកនាំទាំង២ លោក និងលោកស្រី Takaichi នឹងពិភាក្សាអំពីស្ថានភាពក្នុងតំបន់ និងអន្តរជាតិ ក៏ដូចជាវិធានការ ដើម្បីពង្រឹងកិច្ចសហប្រតិបត្តិការទ្វេភាគី នៅក្នុងវិស័យសេដ្ឋកិច្ច សង្គម វប្បធម៌ និងវិស័យផ្សេងៗទៀត៕