អធិការបតីអាល្លឺម៉ង់ លោក Friedrich Merz បាននិយាយថា ការបង្កើត និងការដាក់ពង្រាយកងកម្លាំង  ពហុជាតិក្នុងក្របខ័ណ្ឌនៃការធានាសន្តិសុខសម្រាប់អ៊ុយក្រែន គឺមិនអាចទៅរួចទេ បើគ្មានការយល់ព្រម   ពីរុស្ស៊ី។

លោកបានប្រាប់សន្និសីទសារព័ត៌មានមួយថា៖«ខ្ញុំចង់បញ្ជាក់ឱ្យច្បាស់ ដើម្បីកុំឲ្យមានការយល់ច្រឡំ។ យើងកំពុងនិយាយអំពីការធានាសន្តិសុខសម្រាប់អ៊ុយក្រែន បន្ទាប់ពីមានបទឈប់បាញ់។ គ្មាននរណាម្នាក់នៅទីនេះទេ គ្មានរដ្ឋសមាជិកសហភាពអឺរ៉ុប ឬនៅខាងក្រៅវាទេ ដែលជឿថា យើងគួរតែជ្រៀតជ្រែកក្នុងជម្លោះដែលកំពុងបន្តនៅអ៊ុយក្រែនឥឡូវនេះ»។ លោក Merz បាននិយាយថា នៅក្នុងបរិបទនេះ បញ្ហាគឺ   «គ្រាន់តែអំពីការគាំទ្រផ្នែកយោធាសម្រាប់សន្តិភាព និងកិច្ចព្រមព្រៀងបទឈប់បាញ់»។ 

អធិការបតីអាល្លឺម៉ង់បានកត់សម្គាល់ថា៖«សំណួរថាតើប្រទេសណាខ្លះអាចចូលរួមចំណែក បានកំពុងត្រូវបានពិភាក្សា ហើយយើងទើបតែចាប់ផ្តើមដំណើរការប៉ុណ្ណោះ មិនមែនជាទីបញ្ចប់ទេ»។ លោកបានបញ្ជាក់ថា៖«ការសម្រេចគួរតែមានដូចខាងក្រោម៖ ដំបូងគឺបទឈប់បាញ់ បន្ទាប់មកការធានាសន្តិសុខសម្រាប់អ៊ុយក្រែន សម្រាប់កិច្ចព្រមព្រៀងរយៈពេលវែងជាមួយរុស្ស៊ី។ ពុំមានអ្វីដែលអាចធ្វើទៅបាន ដោយគ្មានការយល់ព្រមពីរុស្ស៊ីនោះទេ ហើយយើងប្រហែលជានៅវែងឆ្ងាយទៀត ដើម្បីសម្រេចរឿងនេះ»៕