ទូរទស្សន៍រដ្ឋអ៊ីរ៉ង់ នៅថ្ងៃសុក្រ (ទី៩ ខែមករា ឆ្នាំ២០២៦) នេះ បានរាយការណ៍ថា មេដឹកនាំកំពូលអ៊ីរ៉ង់ លោក Ali Khamenei នឹងថ្លែងសុន្ទរកថាមួយ ក្នុងរយៈពេលដ៏ខ្លីខាងមុខនេះ ស្តីពី «សកម្មភាពភេរវកម្ម» នៅក្នុងប្រទេស ខណៈដែលការតវ៉ាដោយសារការលំបាកផ្នែកសេដ្ឋកិច្ច នៅតែបន្តមានទូទាំងប្រទេស។

ក្រុមត្រួតពិនិត្យប្រព័ន្ធអ៊ីនធឺណិត NetBlocks បានឲ្យដឹងថា ការដាច់អ៊ីនធឺណិតទូទាំងប្រទេស ត្រូវបានរាយការណ៍នៅក្នុងប្រទេសអ៊ីរ៉ង់ កាលពីថ្ងៃព្រហស្បតិ៍ និងបានបន្តរហូតដល់ថ្ងៃសុក្រនេះ។ ការដាច់នោះកើតមានឡើងស្របនឹងការអំពាវនាវឲ្យមានការតវ៉ាបន្ថែមទៀតពីលោក Reza Pahlavi ដែលជាព្រះរាជបុត្ររបស់ព្រះមហាក្សត្រចុងក្រោយរបស់អ៊ីរ៉ង់ ដែលត្រូវបានទម្លាក់ពីរាជបល្ល័ង្ក អំឡុងបដិវត្តន៍ឥស្លាមឆ្នាំ១៩៧៩។

ដោយបានចាប់ផ្តើមនៅទីក្រុងតេអេរ៉ង់ ដោយអាជីវករ នៅផ្សារ Grand Bazaar ដែលខឹងសម្បាដោយសារការធ្លាក់ចុះយ៉ាងខ្លាំងនូវតម្លៃរូបិយប័ណ្ណជាតិ ការតវ៉ាចុងក្រោយបំផុតនេះ ឥឡូវនេះ មានការចូលរួមពីអ្នកផ្សេងទៀត ភាគច្រើនជាបុរសវ័យក្មេង ជាងស្ត្រី និងក្មេងស្រីៗដែលបានបង្ហាញវត្តមានយ៉ាងសស្រាក់សស្រាំ អំឡុងបាតុកម្មក្នុងឆ្នាំ ២០២២-២០២៣។

ទីភ្នាក់ងារសារព័ត៌មានសកម្មជនសិទ្ធិមនុស្សដែលមានមូលដ្ឋាននៅសហរដ្ឋអាមេរិក បានរាយការណ៍ថា យ៉ាងហោចណាស់មានអ្នកតវ៉ាចំនួន ៣៤នាក់ និងបុគ្គលិកសន្តិសុខ ៤នាក់ ត្រូវបានសម្លាប់ ហើយ ២.២០០នាក់ ត្រូវបានចាប់ខ្លួន ក្នុងអំឡុងពេលមានភាពចលាចល ដែលអ្នកវិភាគលើកឡើងថា ជាការបង្ហាញពីការខកចិត្តយ៉ាងខ្លាំង ចំពោះស្ថានភាពជាក់ស្ដែងបច្ចុប្បន្ន។

គួបញ្ជាក់ថា អាជ្ញាធរបានព្យាយាមរក្សាវិធីសាស្រ្ត ២យ៉ាង ចំពោះភាពចលាចល ដោយប្រាប់ថា ការតវ៉ា ជុំវិញបញ្ហាសេដ្ឋកិច្ច គឺស្របច្បាប់ ហើយនឹងត្រូវបានឆ្លើយតបដោយការសន្ទនា ខណៈពេលដែលឆ្លើយតបទៅនឹងបាតុកម្មខ្លះ ដោយឧស្ម័នបង្ហូរទឹកភ្នែក អំឡុងពេលមានការប្រឈមមុខដាក់គ្នាតាមដងផ្លូវដោយហិង្សា៕