នៅថ្ងៃសុក្រ (ទី៩ ខែមករា ឆ្នាំ២០២៦) នេះ ក្រុមប្រឹក្សាអន្តរកាលភាគខាងត្បូង (STC) របស់ប្រទេសយេម៉ែន បានប្រាប់ឲ្យដឹងថា ខ្លួនកំពុងរំសាយក្រុមនេះ។

សមាជិកជាច្រើនរបស់ក្រុមនេះ បានឲ្យដឹងនៅក្នុងសេចក្តីថ្លែងការណ៍មួយថា ពួកគេមិនបានចូលរួមក្នុងការសម្រេច ទាក់ទងនឹងប្រតិបត្តិការយោធាថ្មីៗរបស់ក្រុមនេះ នៅតំបន់ Hadramout និង al-Mahra នោះឡើយ ដោយបានបន្ថែមថា ប្រតិបត្តិការនេះ «បានធ្វើឲ្យប៉ះពាល់យ៉ាងខ្លាំងដល់បុព្វហេតុភាគខាងត្បូង»។

សមាជិកទាំងនោះបានបញ្ជាក់ទៀតថា កងកម្លាំងក្រុមនេះ មិន «សម្រេចបានគោលដៅដែលបានគ្រោងទុករបស់ខ្លួន» នោះឡើយ។

សេចក្តីថ្លែងការណ៍នេះ ក៏បានសម្តែងក្តីសង្ឃឹមផងដែរថា សន្និសីទទីក្រុងរីយ៉ាដ «នឹងនាំទៅរកចក្ខុវិស័យមួយ ដែលជួយដោះស្រាយបុព្វហេតុភាគខាងត្បូង» ហើយបានអរគុណដល់ប្រទេសអារ៉ាប៊ីសាអ៊ូឌីត ដែលនឹងធ្វើជាម្ចាស់ផ្ទះរៀបចំកិច្ចពិភាក្សានាពេលខាងមុខ។

គួរបញ្ជាក់ថា កងកម្លាំង STC ត្រូវបានបង្កើតឡើងក្នុងឆ្នាំ២០១៧ ដោយមានការគាំទ្រពីប្រទេសអារ៉ាប់រួម ហើយនៅទីបំផុត បានចូលរួមជាមួយរដ្ឋាភិបាលចម្រុះដែលគ្រប់គ្រងភាគខាងត្បូង និងខាងកើតប្រទេសយេម៉ែន។ កាលពីខែមុនក្នុងឆ្នាំកន្លងទៅ កងកម្លាំង STC បានដណ្តើមកាន់កាប់ដែនដីមួយចំនួនភ្លាមៗ ដោយធ្វើឲ្យមានការប្រែប្រួលតុល្យភាពអំណាច និងភាពតានតឹង រវាងអារ៉ាប៊ីសាអ៊ូឌីត និងអារ៉ាប់រួម៕