រុស្ស៊ីពង្រឹងគោលជំហរយូរអង្វែងរបស់ខ្លួនចំពោះការប្រកាសថា កងកម្លាំងលោកខាងលិចនៅអ៊ុយក្រែន នឹងក្លាយជាគោលដៅស្របច្បាប់ រយៈពេលប៉ុន្មានថ្ងៃប៉ុណ្ណោះ ក្រោយបារាំង និងអង់គ្លេស សន្យាថា នឹងបញ្ជូនទាហានរបស់ពួកគេទៅទៅនោះ ក្នុងករណ៍ដែលមានកិច្ចព្រមព្រៀងសន្តិភាព ។

អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បាននិយាយនៅក្នុងសេចក្តីថ្លែងការណ៍ថា ក្រសួងការបរទេសរុស្ស៊ី បានព្រមានថា ការដាក់ពង្រាយអង្គភាពយោធា គ្រឿងយុទ្ធោបករណ៍ ឃ្លាំងគ្រាប់ និងហេដ្ឋារចនាសម្ព័ន្ធផ្សេងទៀតរបស់បណ្តាប្រទេសលោកខាងលិច នៅលើទឹកដីអ៊ុយក្រែន នឹងត្រូវចាត់ទុកថាជាការធ្វើអន្តរាគមន៍បរទេស ។

អ្នកស្រី Zakharova បានឆ្លើយតបចំពោះ “សេចក្តីប្រកាសផែនការ” ដែលត្រូវបានចុះហត្ថលេខាដោយនាយករដ្ឋមន្រ្តីអង់គ្លេសលោក Keir Starmer និងប្រធានាធិបតីបារាំងលោក Emmanuel Macron កាលពីថ្ងៃអង្គារ នៅជំនួបចុងក្រោយនៃក្រុមចម្រុះឆន្ទៈ ជាទីដែលពួកគេបានឯកភាពថានឹងដាក់ពង្រាយកងកម្លាំងពហុជាតិ ដើម្បីធានាសន្តិសុខជូនអ៊ុយក្រែន ។

អ្នកស្រី Zakharova និយាយថា រុស្ស៊ីបានជំទាស់ជាយូរមកហើយចំពោះវត្តមានរបស់ទាហានលោកខាងលិចណាមួយនៅអ៊ុយក្រែន ។ ការព្រមានទាំងនេះ ត្រូវបានបង្ហាញម្តងហើយម្តងទៀតនៅក្នុងកម្រិតខ្ពស់បំផុត ហើយវានៅតែពាក់ព័ន្ធគ្នាដដែល ដោយអ្នកស្រីចាត់ទុកកិច្ចព្រមព្រៀងឈានដល់ដោយសម្ព័ន្ធមិត្តអ៊ុយក្រែនថា ជា “ការប្រកាសយោធានិយមថ្មី” ។

ប្រធានាធិបតីអ៊ុយក្រែនលោក Volodymyr Zelenksy បាននិយាយយ៉ាងទទួចជាយូរមកហើយថា សម្ព័ន្ធមិត្តលោកខាងលិចរបស់លោក ផ្តល់ការធានាសន្តិសុខដ៏រឹងមំាមួយ ដែលជាផ្នែកមួយនៃកិច្ចព្រមព្រៀងសន្តិភាព ដើម្បីរារាំងការវាយលុកនាពេលអនាគតរបស់រុស្ស៊ី ៕