បាល់ទាត់៖ ឯកឧត្តម ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា បានបង្ហាញនូវមុខព្រួញ ១២ចំណុច ដែលត្រូវពង្រឹង និងពង្រីកចីរភាពបាល់ទាត់កម្ពុជាបន្ថែមលើគោលដៅ និងមហិច្ឆតាត្រៀមស៊ីហ្គេមឆ្នាំ២០២៣។ នេះបើតាមការបញ្ជាក់ក្នុងមហាសន្និបាតរបស់សហព័ន្ធកាលពីថ្មីៗ។
ឯកឧត្តមមានប្រសាសន៍ថា ឆ្នាំ២០២២ អាចចាត់ទុកជាដំណាក់កាលពង្រឹងគុណភាពគ្រប់ផ្នែក ក្នុងវិស័យបាល់ទាត់កម្ពុជា ពិសេសកីឡាករដែលមានអាយុប្រកួតស៊ីហ្គេមឆ្នាំ២០២៣។ ហេតុនេះ មុខព្រួញសំខាន់ៗទាក់ទងដោយផ្ទាល់ជាមួយមូលដ្ឋានកសាងគុណភាពកីឡា មានដូចជាការប្រកួតថ្នាក់ជាតិ និងអន្ដរជាតិ គុណភាពគ្រូបង្ហាត់ និងការដឹកនាំគ្រប់គ្រង ការផ្ដល់បរិយាកាសល្អប្រសើរសម្រាប់ជីវភាពរស់នៅ និងការសិក្សាជាដើម កំពុងសិក្សាយ៉ាងយកចិត្តទុកដាក់ពីថ្នាក់ដឹកនាំសហព័ន្ធ។ អនុប្រធានសហព័ន្ធដដែលសង្កត់ធ្ងន់ថា ទោះបីជាលទ្ធផលដ៏ល្អបំផុតថ្មីមួយ គឺជាសេចក្ដីប៉ងប្រាថ្នារបស់ប្រជាជាតិកម្ពុជាទាំងមូលនៅក្នុងស៊ីហ្គេម២០២៣ ក៏សហព័ន្ធនៅតែផ្ដោតការយកចិត្តទុកដាក់ដោយកំណត់អាទិភាព សម្រាប់ការអភិវឌ្ឍន៍បាល់ទាត់ឲ្យមានចីរភាពផងដែរ។ ក្នុងន័យនេះ គោលដៅសម្រាប់កម្មវិធី និងសកម្មភាពការងារឆ្នាំ២០២២ និងចាប់ពីឆ្នាំ២០២៣ ទៅគឺការនៅបន្តពង្រីក និងពង្រឹងមុខព្រួញទាំង១២ រួមមាន៖
១. ការកសាងហេដ្ឋារចនាសម្ព័ន្ធដែលត្រួតពិនិត្យ និងថែទាំទីលានសាលាតម្រង់ទិសទាំង ២៥រាជធានី/ខេត្តឲ្យមានគុណភាពខ្ពស់គិតចាប់ពីឆ្នាំ២០២២ តទៅ
២. ការរៀបចំពង្រឹងគុណភាពប្រកួតថ្នាក់ជាតិឲ្យកាន់តែទូលំទូលាយ ជាពិសេសតាមបណ្ដាខេត្ត
៣. ពង្រឹងគុណភាពលីគកម្រិតទី១ និងរៀបចំលីគកម្រិតទី២
៤. រៀបចំថ្នាលយុវជនឲ្យកាន់តែមានប្រសិទ្ធភាព
៥. បង្កើនការកសាងធនធានគ្រូ អាជ្ញាកណ្ដាល និងមន្ត្រីជំនាញពាក់ព័ន្ធ
៦. លើកកម្ពស់គុណភាពក្រុមជម្រើសជាតិគ្រប់កម្រិតទាំងបុរស និងនារី
៧. ជំរុញការអភិវឌ្ឍន៍បាល់ទាត់ក្នុងសាល
៨. រៀបចំគម្រោងអភិវឌ្ឍន៍បាល់ទាត់នារីឲ្យកាន់តែមានប្រសិទ្ធភាព និងគុណភាព
៩. ពង្រីកវិសាលភាពនៃការរៀបចំទទួលម្ចាស់ផ្ទះ ទាំងការប្រកួតអន្តរជាតិផ្លូវការ និងមិត្តភាព
១០. លើកកម្ពស់គុណភាព និងប្រសិទ្ធភាពការងាររដ្ឋបាលគ្រប់គ្រង របស់សហព័ន្ធកីឡាបាល់ទាត់កម្ពុជាឲ្យកាន់តែល្អប្រសើរ ក្នុងការផ្ដល់សេវាកម្មដល់សមាជិកទាំងអស់
១១. រៀបចំសមាគមបាល់ទាត់រាជធានី/ខេត្តឲ្យកាន់តែមានភាពសមស្របផ្នែកផ្លូវច្បាប់ជាមួយ ស.ប.ក និងសហព័ន្ធបាល់ទាត់អន្តរជាតិ ដើម្បីឲ្យកាន់តែប្រសើរក្នុងការអភិវឌ្ឍនបាល់ទាត់នៅតាមក្លិប សមាគមរាជធានីខេត្ត
១២. រៀបចំបង្កើតកម្មវិធីសម្រាប់អ្នកគាំទ្រ
ឯកឧត្តម ខៀវ សាម៉េត បន្ដថា ដើម្បីឲ្យក្រុមបាល់ទាត់ជម្រើសជាតិនៃប្រទេសមួយខ្លាំង លុះត្រាតែចំណុចអាទិភាពទាំង១២ នេះត្រូវបានអភិវឌ្ឍនឲ្យល្អប្រសើរទាំងបរិមាណ និងគុណភាពព្រមគ្នា។ ហេតុដូចនេះឯកឧត្តមបានសំណូមពរឲ្យមហាគ្រួសារបាល់ទាត់កម្ពុជា រួមមានក្លិបអាជីព សមាគមរាជធានី-ខេត្ត រួមទាំងកីឡាករ គ្រូបង្ហាត់ អាជ្ញាកណ្ដាល មន្ត្រីជំនាញពាក់ព័ន្ធទាំងអស់ ដែលប្រៀបបានដូចជាមនុស្សជិះទូកតែមួយ ត្រូវរួមគ្នាដើម្បីឆ្លងទៅកាន់ត្រើយ២០២៣ នឹងកាន់តែមានសាមគ្គីភាព យោគយល់គ្នា ចូលរួមលះបង់ ប្រកបដោយជំហរឹងមាំផ្អែកលើគោលការណ៍ជាតិជាធំ ចំពោះការអនុវត្តភារកិច្ចរៀងៗខ្លួនក្នុងតួនាទីជាភ្នាក់ងារអភិវឌ្ឍន៍បាល់ទាត់ ដើម្បីគោលដៅតែមួយគឺជោគជ័យរបស់ «គោព្រៃកម្ពុជា២០២៣»៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
