កងកម្លាំងគាំទ្រដោយអារ៉ាប៊ីសាអ៊ូឌីត បានចូលទៅដណ្តើមយកទីក្រុងសំខាន់នៅភាគខាងត្បូងប្រទេសយេម៉ែនកាលពីថ្ងៃព្រហស្បតិ៍ ក្រោយទីក្រុង Riyadh ចោទប្រកាន់អារ៉ាប់រួមថា បានជួយឲ្យមេដឹកនំាក្រុមផ្តាច់ខ្លួនរត់គេចខ្លួន ។

ដោយលើកឡើងពីប្រភពចារកម្មដែលអាចជឿជាក់បាន ក្រុមចម្រុះដឹកនាំដោយអារ៉ាប៊ីសាអ៊ូឌីតនៅយេម៉ែន និយាយថា មេដឹកនាំរបស់ក្រុមប្រឹក្សាអន្តរកាលភាគខាងត្បូង(STC)គាំទ្រដោយអារ៉ាប់រួមលោក Aidarous al-Zubaidi បានចាកចេញពីប្រទេសយេម៉ែនតាមទូកនៅពេលយប់ស្ងាត់ ទៅកាន់ដែនដី Somaliland មុនពេលឡើងជិះយន្តហោះទៅកាន់ប្រទេសម៉ូហ្គាឌីស៊ូ ដែលក្រោយមកដឹកគាត់ទៅកាន់អាកាសយានដ្ឋានយោធានៅទីក្រុង Abu Dhabi ។

ក្រសួងមហាផ្ទៃយេម៉ែនគាំទ្រដោយអារ៉ាប៊ីសាអ៊ូឌីត និយាយនៅក្នុងសេចក្តីថ្លែងការណ៍ថា កងកម្លាំងខែលការពារជាតិ(NSF)ដែលជាសម្ព័ន្ធភាពជាមួយរដ្ឋាភិបាលយេម៉ែន ដណ្តើមបានទីក្រុងភាគខាងត្បូង Aden ហើយស្ថានភាពសន្តិសុខរបស់ពួកគេ ស្ថិតក្រោមការគ្រប់គ្រង ។

កងកម្លាំង NSF បានបង្ហោះវីដេអូនៅលើបណ្តាញព័ត៌មានសង្គមឃើញក្បួនរថពាសដែកដ៏ធំមួយ កំពុងចល័តចូលទៅដណ្តើមខេត្តជាច្រើននៅភាគខាងត្បូងដែលធ្លាប់ត្រូវបានដណ្តើមគ្រប់គ្រងដោយកងកម្លាំង STC និងក្រុមជីវពលសម្ព័ន្ធមិត្ត ។

ទីក្រុង Aden បានក្លាយជាទីតាំងឈរជើងរបស់រដ្ឋាភិបាលយេម៉ែន ចាប់តាំងពីក្រុមឧទ្ទាមហ៊ូធីគាំទ្រដោយអ៊ីរ៉ង់ ដណ្តើមកាន់កាប់បានទីក្រុង Sana’a កាលពីឆ្នាំ ២០១៤ បង្ខំឲ្យមានការធ្វើអន្តរាយគមន៍ផ្នែកយោធាពីអារ៉ាប៊ីសាអ៊ូឌីត និងអារ៉ាប់រួម នៅរយៈពេល ១ឆ្នាំក្រោយមក ៕