គណបក្សប្រឆាំងស្តាំនិយមជ្រុល និងឆ្វេងនិយមជ្រុលរបស់បារាំង នឹងដាក់ញត្តិដកសេចក្ដីទុកចិត្ត ប្រឆាំងនឹងរដ្ឋាភិបាលសំឡេងភាគតិចដ៏ទន់ខ្សោយរបស់បារាំង ជាការឆ្លើយតបទៅនឹងការអនុម័តដែលទំនងជាកើតមាននៅថ្ងៃសុក្រ (ទី៩ ខែមករា ឆ្នាំ២០២៦) នេះ សម្រាប់កិច្ចព្រមព្រៀងពាណិជ្ជកម្ម Mercosur របស់សហភាពអឺរ៉ុប (EU)។

គណបក្សឆ្វេងនិយមជ្រុល France Unbowed (LFI) បានឲ្យដឹងថា ខ្លួននឹងដាក់ញត្តិដកសេចក្ដីទុកចិត្តនៅព្រឹកថ្ងៃសុក្រ (ពេលវេលាក្នុងស្រុក) ខណៈដែលគណបក្សស្ដាំនិយមជ្រុល National Rally (RN) បានប្រាប់ថា ខ្លួនក៏នឹងដាក់ញត្តិផងដែរ ប្រឆាំងនឹងប្រធានគណៈកម្មការអឺរ៉ុប នៅទីក្រុងប្រ៊ុចសែល ប្រទេសបែលហ្ស៊ិក។

ញត្តិដកសេចក្ដីទុកចិត្តទាំងនេះ បានគូសបញ្ជាក់ពីផលប៉ះពាល់ផ្នែកនយោបាយក្នុងប្រទេស ដែលរដ្ឋាភិបាលរបស់ប្រធានាធិបតីបារាំង លោក Emmanuel Macron ប្រឈមជាមួយ ជុំវិញកិច្ចព្រមព្រៀងពាណិជ្ជកម្មជាមួយបណ្ដាប្រទេស នៅតំបន់អាមេរិកខាងត្បូង ខណៈដែលខ្លួនកំពុងជួបការលំបាក ក្នុងការអនុម័តច្បាប់ថវិកាឆ្នាំ២០២៦ ដែលត្រូវបានពន្យារពេលរួចហើយ នៅក្នុងសភាពេញដោយភាពចម្រូងចម្រាស។

វាហាក់ដូចជាមិនទំនងជាអាចទៅរួចនោះឡើយ ដែលគណបក្ស RN និង LFI នឹងប្រមូលផ្ដុំបានសំឡេងគ្រប់គ្រាន់ នៅក្នុងសភា ដើម្បីផ្តួលរំលំរដ្ឋាភិបាលដែលដឹកនាំដោយនាយករដ្ឋមន្ត្រី លោក Sebastien Lecornu។ តែយ៉ាងណាក្ដី ការគំរាមកំហែងរបស់ពួកគេ បានគូសបញ្ជាក់ពីភាពតានតឹងខាងនយោបាយដ៏គ្រោះថ្នាក់ខ្លាំង ដែលរដ្ឋបាលរបស់លោក Macron បន្តប្រឈមជាមួយ ពោលគឺត្រឹមតែជាងមួយឆ្នាំមុនការបោះឆ្នោតប្រធានាធិបតីឆ្នាំ២០២៧៕