​គុន​ចម្រុះ៖ ទីបំផុត​អ្នកលេង​គុន​ចម្រុះ​កម្ពុជា ចាន់ រតនា ត្រូវបាន​ផ្គូផ្គង​ឲ្យ​ជួប​អ្នកលេង​គុន​ចម្រុះ​ឥណ្ឌូនេស៊ី Eko Roni Saputra ដោយ​ត្រូវ​ប្រកួត​លើស​ង្វៀន​កម្រិត​ពិភពលោក ONE Championship នា​ល្ងាច​ថ្ងៃទី​១១ ខែមីនា​ចុង​សប្ដាហ៍​នេះនៅ​ប្រទេស​សិង្ហ​បុរី។​

Eko Roni បានប្រកាស​ចង់​ជួប​ជើង​ខ្លាំង​កម្ពុជា ចាន់ រតនា ជាង ១​ឆ្នាំ​មកហើយក្នុង​គោលបំណង​ចង់​សាក​ថ្វីដៃ​ផង និង​សងសឹក​ឲ្យ​មិត្ត​រួម​ជាតិ​របស់ខ្លួន ២​រូបចាញ់​ក្រោម​កណ្ដាប់ដៃ​អ្នកលេង​គុន​ខ្មែ​រូបនេះ​ផង។ ដូច្នេះ​នេះ​គឺជា​ជំនួប​ដ៏​សំខាន់​​សម្រាប់​អ្នក​ទាំងពីរ។​ ​គួរ​ដឹងថា ក្នុងចំណោម​ជ័យជម្នះ ៦​លើក​លើស​ង្វៀន ONE ចាន់ រតនា ធ្លាប់បាន​យកឈ្នះ​កីឡាករ​ឥណ្ឌូនេស៊ី ២​រូបដោយ​កាលពី​ឆ្នាំ​២០១៨ រូបគេ​បាន​ផ្ដួល​ជើង​ខ្លាំង Abro Fernandes ត្រឹម​ទឹក​ទី​២ មុន​បន្ដ​ផ្ដួល​កីឡាករ​ឥណ្ឌូនេស៊ី​ម្នាក់ទៀតគឺ​កីឡាករ Rudy Agustian ត្រឹម​ទឹក​ទី​២ ដូចគ្នាកាលពី​ឆ្នាំ​២០១៩។​ ​ហេតុនេះហើយ​ទើប Eko Roni ប៉ង​ចង់​ជួប ចាន់ រតនា ក្នុង​គោលបំណង​ចង់​បំបែក​កំណត់ត្រា ទី​១-​ចង់​សងសឹក​ឲ្យ​កីឡាករ​មិត្ត​រួម​ជាតិ និង​ទី​២-​ចង់​ប្រាកដថារូបគេ​ជា​កីឡាករ​ឥណ្ឌូនេស៊ី​ដំបូង ដែល​អាច​ដណ្ដើម​ជ័យជម្នះ​លើ​កីឡាករ​ជើង​ខ្លាំង​កម្ពុជា​រូបនេះ ដ្បិត​កន្លងមកមិនទាន់មាន​កីឡាករ​ឥណ្ឌូនេស៊ី​រូប​ណាអាច​យកឈ្នះ ចាន់ រតនា បានឡើយ។​

​សូមបញ្ជាក់ថា មុន​ជួប ចាន់ រតនា កីឡាករ​ឥណ្ឌូនេស៊ី Eko Roni ធ្លាប់បាន​ឡើង​ប្រកួត​លើស​ង្វៀន ONE ៦​លើ​ក​ឈ្នះ ៥​លើក ខណៈ​ប្រកួត​ចុងក្រោយ​យកឈ្នះ​កីឡាករ​ចិន Pengshuai Liu ត្រឹម​ទឹក​ទី​១។ រីឯ ចាន់ រតនា ក្រោយ​ភ្លាត់​ចាញ់​ជើង​ខ្លាំង​ចិន Xie Wei កាល​ចុងឆ្នាំ​២០២០ រូបគេ​បាន​ខកខាន​ឡើង​សង្វៀន​លំដាប់​ពិភពលោក​នេះ។​ ​បច្ចុប្បន្ន ចាន់ រតនា បាន​ត្រឡប់មក​កម្ពុជា​វិញ​ហើយ ក្រោយ​ទៅលេង​ប្រពន្ធ​កូន​នៅ​ប្រទេស​បារាំង​មួយរយៈ​ពេល​ធំ ហើយ​កំពុង​សម្រុក​ហ្វឹកហាត់ដើម្បី​ត្រៀម​ការប្រកួត​ដ៏​សំខាន់​នេះ។ ក្នុងការ​ប្រកួត​នេះ រតនា ក៏មាន​កាតព្វកិច្ច​សំខាន់ៗ ២ ដែរ ទី​១ ធ្វើយ៉ាងណា​រក្សា​កំណត់ត្រា​ជ័យជម្នះ​របស់ខ្លួន​លើ​កីឡាករ​ឥណ្ឌូណេស៊ី និង​ទី​២ ក៏​ជា​ផ្នែក​មួយ​ក្នុងការ​សងសឹក​ឲ្យ​មិត្ត​រួម​ជាតិគឺ​កីឡាករ ខុន ស៊ី​ចាន់ ដែល​ធ្លាប់​ចាញ់ Eko Roni ផងដែរ៕

​អត្ថបទ៖ លី ឈុន​ឡា