តំណាងរាស្រ្តហុងឌូរ៉ាស់មួយរូប បានរងរបួស ក្រោយជនល្មើសមិនស្គាល់អត្តសញ្ញាណម្នាក់ ចោលគ្រឿងផ្ទុះលើច្រករបៀងខាងក្រៅសភា ជាទីដែលសមាជិកគណបក្សជាតិអភិរក្សនិយម ធ្វើសន្និសីទសារព័ត៌មាន ។

គណបក្សនិយាយនៅក្នុងសេចក្តីថ្លែងការណ៍កាលពីថ្ងៃព្រហស្បតិ៍ថា គណបក្សជាតិហុងឌូរ៉ាស់ បានធ្វើការថ្កោលទោសរាល់សកម្មភាពទំាងអស់នៃអំពើហិង្សានយោបាយដែលបានគំរាមកំហែងដល់អាយុជីវិត ភាពសុចរិត និងស្ថាប័នប្រជាធិបតេយ្យរបស់ប្រទេសមួយនេះ ។

ឧបទ្ទេវហេតុនេះគូសបញ្ជាក់ពីបរិយាកាសនយោបាយដ៏តានតឹងនៅក្នុងប្រទេសហុងឌូរ៉ាស់ ជាទីដែលការប្រកួតប្រជែងប្រធានាធិបតីដ៏ក្តៅគគុកកាលពីថ្ងៃទី ៣០ ខែវិច្ឆិកា ឈានដល់កម្រិតកំពូលនៃការរាប់សន្លឹកឆ្នោតរយៈពេល ១សប្តាហ៍ និងលទ្ធផលជម្លោះ ។

នៅទីបំផុតលោក Nasry Asfura ដែលជាបេក្ខជនមកពីគណបក្សជាតិ ត្រូវបានប្រកាសជាអ្នកឈ្នះ នៅថ្ងៃទី ២៤ ខែធ្នូ ឆ្នាំ ២០២៥ ។

សមាជិកសភាហុងឌូរ៉ាស់ បានកោះប្រជុំកាលពីថ្ងៃព្រហស្បតិ៍ ដើម្បីពិចារណាលើលទ្ធភាពនៃការរាប់សន្លឹកឆ្នោតឡើងវិញ គឺជាសំណើរមួយលើកឡើងដោយគណបក្សកាន់អំណាចឆ្វេងនិយមត្រូវចាកចេញគឺគណបក្សសេរីភាព និងកសាងឡើងវិញ(LIBRE) ។

ស្របពេលដែលក្រុមប្រឹក្សាជាតិរៀបចំការបោះឆ្នោត បញ្ជាក់ថា លោក Asfura គឺជាអ្នកឈ្នះការបោះឆ្នោតជ្រើសរើសប្រធានាធិបតីនោះ គណបក្ស LIBRE នៅមិនទាន់ទទួលយកលទ្ធផលនៅឡើយនោះទេ ដោយសារជ័យជម្នះមានគម្លាតតូចចង្អៀត និងភាពមិនប្រក្រតីរងការចោទប្រកាន់ អំឡុងពេលរាប់សន្លឹកឆ្នោត ៕