យោធាអ៊ីស្រាអែលបាននិយាយថា ខ្លួនបានវាយប្រហារគោលដៅរបស់ក្រុមហេសបូឡានៅក្នុងតំបន់ជាច្រើននៅប្រទេសលីបង់កាលពីថ្ងៃសុក្រ ទី៩ ខែមករា មួយថ្ងៃបន្ទាប់ពីកងទ័ពលីបង់បាននិយាយថាខ្លួនបានបញ្ចប់ដំណាក់កាលដំបូងនៃផែនការរបស់ខ្លួនដើម្បីដកហូតអាវុធពីក្រុមនេះ។

ក្រោមសម្ពាធរបស់សហរដ្ឋអាមេរិក និងក្នុងពេលមានការព្រួយបារម្ភពីការវាយប្រហាររបស់អ៊ីស្រាអែលដែលបានពង្រីក ប្រទេសលីបង់បានប្តេជ្ញាដកហូតអាវុធពីក្រុមសកម្មប្រយុទ្ធគាំទ្រដោយអ៊ីរ៉ង់ ដែលបានចុះខ្សោយដោយអរិភាពជាងមួយឆ្នាំជាមួយអ៊ីស្រាអែល រួមទាំងសង្គ្រាមពេញបន្ទុករយៈពេលពីរខែដែលបានបញ្ចប់ទៅដោយបទឈប់បាញ់កាលពីខែវិច្ឆិកា ឆ្នាំ២០២៤។

ទោះបីជាមានបទឈប់បាញ់ក៏ដោយ អ៊ីស្រាអែលបានបន្តវាយប្រហារជាប្រចាំនៅក្នុងប្រទេសលីបង់ ដោយជានិយាយថាខ្លួនកំពុងកំណត់គោលដៅទីតាំងនិងប្រតិបត្តិការរបស់ក្រុមហេសបូឡា ហើយបានរក្សាកងទ័ពនៅក្នុងតំបន់ភាគខាងត្បូងប្រទេសលីបង់ចំនួនប្រាំកន្លែងដែលខ្លួនចាត់ទុកថាជាយុទ្ធសាស្ត្រ ដោយចោទប្រកាន់ក្រុមនេះថាបានចាប់កាន់អាវុធជាថ្មី។

នៅក្នុងសេចក្តីថ្លែងការណ៍កាលពីថ្ងៃសុក្រ យោធាអ៊ីស្រាអែលបាននិយាយថា ខ្លួនបានវាយប្រហារតំបន់ជាច្រើននៅក្នុងប្រទេសលីបង់ ដោយកំណត់គោលដៅ «ទីតាំងផ្ទុកអាវុធ និងទីតាំងផលិតអាវុធដែលត្រូវបានប្រើប្រាស់សម្រាប់ការស្តារឡើងវិញ និងការកសាងយោធារបស់អង្គការភេរវកម្មហេសបូឡា»។

«បន្ថែមលើនេះ ទីតាំងបាញ់បង្ហោះ និងជើងទម្របាញ់រ៉ូក្កែតជាច្រើន រួមជាមួយនឹងរចនាសម្ព័ន្ធយោធា ត្រូវបានវាយប្រហារ»។ ទីភ្នាក់ងារសារព័ត៌មានផ្លូវការលីបង់ NNA បានរាយការណ៍ពីការវាយប្រហារនៅភាគខាងត្បូងប្រទេសលីបង់ នៅតំបន់ឆ្ងាយពីព្រំដែន ព្រមទាំងនៅតំបន់ Bekaa ភាគខាងកើត ជាកន្លែងដែលក្រុមហេសបូឡាមានវត្តមានយ៉ាងរឹងមាំ ។