ក្រុមអ្នកជួយសង្គ្រោះដែលពាក់មួកសុវត្ថិភាព និងអេស្កាវ៉ាទ័រ បានជីកកកាយ ដើម្បីស្វែងរកអ្នកនៅរស់រានមានជីវិត នៅថ្ងៃសៅរ៍ (ទី១០ ខែមករា) នៅក្រោមគំនរសំរាមខ្ពស់ដូចភ្នំដែលបានកប់បុគ្គលិកចាក់សំរាមរាប់សិបនាក់ នៅកណ្តាលប្រទេសហ្វីលីពីន ដោយបានសម្លាប់មនុស្សយ៉ាងហោចណាស់ ៤នាក់។

កម្មករប្រមូលសំរាមប្រហែល ៥០នាក់ ត្រូវបានកប់ នៅពេលដែលសំរាមបានបាក់រលំសង្កត់លើពួកគេ កាលពីថ្ងៃព្រហស្បតិ៍ ជាអ្វីដែលក្រុមប្រឹក្សាក្រុងប៉ាន់ប្រមាណថា មានកម្ពស់ស្មើអគារ ២០ជាន់ នៅទីលានចាក់សំរាម Binaliw Landfill ដែលជាកន្លែងដំណើរការដោយឯកជន នៅក្នុងទីក្រុង Cebu។

អ្នកជួយសង្គ្រោះទីក្រុង Cebu លោកស្រី Jo Reyes បានប្រាប់សារព័ត៌មាន AFP នាថ្ងៃសៅរ៍នេះថា ក្រុមអ្នកជួយសង្គ្រោះ កំពុងប្រឈមមុខនឹងគ្រោះថ្នាក់នៃការបាក់រលំបន្ថែមទៀត ខណៈពេលដែលពួកគេរុករកគំនរបាក់បែក។

លោកស្រីបាននិយាយថា៖ «ប្រតិបត្តិការកំពុងបន្តរហូតមកដល់ពេលនេះ។ វានៅតែបន្តមាន។ (ប៉ុន្តែ) ពីមួយពេលទៅមួយពេល កន្លែងចាក់សំរាមកំពុងផ្លាស់ទី ហើយនោះនឹងបញ្ឈប់ប្រតិបត្តិការជាបណ្តោះអាសន្ន។ យើងត្រូវឈប់បន្តិចសិន ដើម្បីសុវត្ថិភាពរបស់អ្នកជួយសង្គ្រោះរបស់យើង»។

ព័ត៌មានពីកន្លែងគ្រោះមហន្តរាយ បានលេចឡើងយឺតៗ ដោយបុគ្គលិកក្រុង បានលើកឡើងពីកង្វះខាតបីការផ្ដល់សញ្ញាពីទីកន្លែងចាក់សំរាម ដែលបម្រើសេវាកម្មដល់ទីក្រុងសេប៊ូ និងសហគមន៍ ជុំវិញផ្សេងទៀត។

លោក Joel Garganera សមាជិកក្រុមប្រឹក្សាក្រុងសេប៊ូ បានប្រាប់សារព័ត៌មានថា គិតត្រឹមម៉ោង ១០ព្រឹក (ម៉ោងក្នុងស្រុក) ចំនួនអ្នកស្លាប់ដោយសារគ្រោះមហន្តរាយនេះ បានកើនឡើងដល់ ៤នាក់យ៉ាងតិច ខណៈ ៣៤នាក់នៅតែបាត់ខ្លួន៕