ប្រទេសចិន រុស្ស៊ី និងអ៊ីរ៉ង់ បានចាប់ផ្តើមសមយុទ្ធកងទ័ពជើងទឹករួមគ្នារយៈពេល ១សប្តាហ៍ នៅក្នុងដែនទឹកអាហ្វ្រិកខាងត្បូង នាថ្ងៃសៅរ៍ (ទី១០ ខែមករា ឆ្នាំ២០២៦) ជាអ្វីដែលប្រទេសម្ចាស់ផ្ទះ បានពិពណ៌នាថា ជាប្រតិបត្តិការ BRICS Plus ដើម្បី «ធានាសុវត្ថិភាពដល់សកម្មភាពដឹកជញ្ជូន និងសេដ្ឋកិច្ចតាមសមុទ្រ»។

BRICS Plus គឺជាការពង្រីកប្លុកភូមិសាស្ត្រនយោបាយ ដែលដើមឡើយមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង ហើយត្រូវបានសមាជិកមើលឃើញថា ជាឥទ្ធិពលដ៏មានតុល្យភាពទប់ទល់នឹងការត្រួតត្រាសេដ្ឋកិច្ចរបស់សហរដ្ឋអាមេរិក និងលោកខាងលិច ដើម្បីរួមបញ្ចូលប្រទេសចំនួន ៦ ផ្សេងទៀត។

ទោះបីជាអាហ្វ្រិកខាងត្បូងធ្វើសមយុទ្ធកងទ័ពជើងទឹកជាប្រចាំ ជាមួយចិន និងរុស្ស៊ីក៏ដោយ ក៏ការហាត់សមនេះកើតឡើងស្របពេលដែលមានភាពតានតឹងកាន់តែខ្លាំងឡើង រវាងរដ្ឋបាលរបស់ប្រធានាធិបតីអាមេរិក Donald Trump និងក្រុមប្រទេស BRICS Plus មួយចំនួន ដែលរួមមានចិន អ៊ីរ៉ង់ អាហ្វ្រិកខាងត្បូង និងប្រេស៊ីល។

ប្លុក BRICS ដែលបានបន្ថែមចំនួនសមាជិកនេះ ក៏រួមមានអេហ្ស៊ីប ឥណ្ឌូនេស៊ី អារ៉ាប៊ីសាអ៊ូឌីត អេត្យូពី និងអារ៉ាប់រួមផងដែរ។ មន្ត្រីយោធាចិនដែលដឹកនាំពិធីបើកសមយុទ្ធនេះ បានប្រាប់ឲ្យដឹងថា ប្រេស៊ីល អេហ្ស៊ីប និងអេត្យូពី បានចូលរួមក្នុងនាមជាអ្នកសង្កេតការណ៍។

យោធាអាហ្វ្រិកខាងត្បូងបានឲ្យដឹងនៅក្នុងសេចក្តីថ្លែងការណ៍មួយថា៖ «សមយុទ្ធ WILL FOR PEACE 2026 ប្រមូលផ្តុំកងទ័ពជើងទឹកមកពីបណ្ដាប្រទេស BRICS Plus សម្រាប់ប្រតិបត្តិការសុវត្ថិភាពសមុទ្ររួមគ្នា (និង) សមយុទ្ធអន្តរប្រតិបត្តិការ»៕