រាជធានីភ្នំពេញ ៖ កម្លាំងនគរបាលការិយាល័យជំនាញពាក់ព័ន្ធ នៃស្នងការដ្ឋាននគរបាលរាជធានីភ្នំពេញ បានបើកប្រតិបត្តិការស្រាវជ្រាវ រហូតឈានទៅបង្ក្រាបបានឧក្រិដ្ឋជនជាជនជាតិចិនមួយក្រុម ជាប់ពាក់ព័ន្ធការចាប់បង្ខាំងធ្វើទារុណកម្មមនុស្ស និងជំរិតទារប្រាក់ ។ 

លោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នៅថ្ងៃទី១០ ខែមករា ឆ្នាំ២០២៦នេះ បានប្រាប់ឲ្យដឹងថា ៖ ការបង្ក្រាបនេះធ្វើឡើង ក្រោយទទួលបានព័ត៌មាន កាលពីថ្ងៃទី០៥ មករា ឆ្នាំ២០២៦ តាមរយៈការរាយការណ៍ទៅកាន់ផេកហ្វេសបុកផ្លូវការរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃរួចមក ថាមានការចាប់បង្ខាំងមនុស្សធ្វើទារុណកម្ម និងជំរិតទារប្រាក់ នៅក្នុងសណ្ឋាគារមួយកន្លែង ក្នុងរាជធានីភ្នំពេញ ។ 

លោកឧត្តមសេនីយ៍ស្នងការបន្ថែមថា ៖ ក្រោយទទួលបានព័ត៌មានហើយនោះ កម្លាំងនគរបាលផែនប្រឆាំងបទល្មើសច្ចេកវិទ្យា , ការិយាល័យអន្តរាគមន៍ និងតម្រួតបទបញ្ជា និងកម្លាំងនគរបាលខណ្ឌចំការមន ដោយមានការសម្របសម្រួលនីតិវិធីច្បាប់ពីលោកសេង ហៀង ព្រះរាជអាជ្ញារង នៃអយ្យការអមសាលា ដំបូង រាជធានី ភ្នំពេញ បានបើកប្រតិបត្តិការចុះស្រាវជ្រាវទៅដល់សណ្ឋាគារមួយកន្លែង ឈ្មោះ ហ័រ ហួយ គ័ន ស៊ី ជាន ថាង ហូថែល ឯ.ក ស្ថិតក្នុងអគារ ហ័រសាន អន្តរជាតិ ផ្លូវបើក ថ្មី ភូមិ១៤ សង្កាត់ទន្លេបាសាក់ ខណ្ឌចំការមន ដោយបានចូលឆែកឆេរនៅបន្ទប់លេខ៣៩-១០ ជាន់ទី៣៩, បន្ទប់លេខ៤០-០៩ ជាន់ទី៤០ ដែលជាបន្ទប់ប្រព្រឹត្តិបទល្មើសពីសំណាក់ក្រុមឧក្រិដ្ឋជន ។ 

ជាលទ្ធផល កម្លាំងសមត្ថកិច្ច ជំនាញ បានរក ឃើញជនរង គ្រោះឈ្មោះ LIANG TAO ភេទប្រុស អាយុ ៤៧ឆ្នាំ ជនជាតិចិន(រងរបួសធ្ងន់) ក្នុងបរិវេណសណ្ឋាគារខាងលើ និងបានធ្វើការឃាត់ខ្លួនជនសង្ស័យម្នាក់ឈ្មោះ ម៉ា ជីវ៉ៃ ភេទប្រុស អាយុ៣២ឆ្នាំ ជាជនជាតិចិន សញ្ជាតិខ្មែរ ( អ្នកសមគំនិត ) ។ ក្រោយការចាប់ខ្លួនជនសង្ស័យរូបនេះហើយនោះ កម្លាំងជំនាញ ក៏បានបន្តការស្រាវជ្រាវ រហូតឈានទៅឃាត់ជនជាតិចិនជាបក្សពួក០២នាក់ ( ជនដៃដល់) បន្ថែមទៀត នៅក្នុងអាកាសយានដ្ឋានអន្តរជាតិតេជោ គ្រាដែលឧក្រិដ្ឋជនទាំង០២នាក់ កំពុងព្យាយាមរត់គេចខ្លួនចេញពីប្រទេសកម្ពុជា ។ 

ជនសង្ស័យជាជនដៃដល់ទាំង០២នាក់ខាងលើមានឈ្មោះ CHEN XIANGLIANG ភេទប្រុស អាយុ៣៦ឆ្នាំ និង ម្នាក់ទៀត ឈ្មោះ FU DONGDONG ភេទប្រុស អាយុ៣៦ឆ្នាំ ។ បច្ចុប្បន្នជនសង្ស័យទាំង០៣នាក់ ត្រូវបានបញ្ចូនខ្លួនទៅកាន់តុលាការដើម្បីមានវិធានការទៅតាមផ្លូវច្បាប់ ខណៈបក្សពួករបស់ពួកគេដែលនៅសេសសល់ កម្លាំងសមត្ថកិច្ចជំនាញ កំពុងបន្តការស្រាវជ្រាវតាមចាប់ខ្លួនបន្តទៀត ។ 

ក្នុងការបង្ក្រាបក្រុមឧក្រិដ្ឋជនទាំង០៣នាក់ខាងលើនេះ សមត្ថកិច្ចក៏បានដកហូតវត្ថុតាងមួយចំនួនផងដែរ ដែលជាប់ពាក់ព័ន្ធនឹងការប្រព្រឹត្តិសកម្មភាព ធ្វើទារុណកម្ម និងការបង្កហិង្សាដើម្បីជំរិតទារប្រាក់លើជនរងគ្រោះ ។ 

តាមការបញ្ជាក់បន្ថែមរបស់លោកឧត្តមសេនីយ៍ឯក ជួន ណារិន្ទ ក្រុមឧក្រិដ្ឋជនទាំងនេះមានបណ្ដាញចាត់តាំងច្បាស់លាស់ និងធ្វើតែរឿងបែបនេះច្រើនករណីហើយ ដោយជនរងគ្រោះមិនដែលហ៊ានប្ដឹងសមត្ថកិច្ចនោះឡើយ ព្រោះការគំរាមរបស់មេក្លោងដែលនៅពីក្រោយអំពើបទល្មើសខាងលើ ថានឹងសម្លាប់ បើបែកធ្លាយព័ត៌មាន អំពីសកម្មភាពបទល្មើសរបស់ពួកគេ ៕ លីហេង