ក្នុងពិធីជំនួបធុរៈកិច្ចសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា ឆ្នាំ២០២៥ និងដាក់ផែនការបន្តអនុវត្តក្នុងឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានថ្លែងការអបអរសាទរ និងពេញចិត្តខ្លាំង ខណៈចាប់ពីខែនេះតទៅអង្គការសមាគម និងប្រតិបត្តិករទេសចរណ៍នានាទៀត បានបង្ហាញការប្តេជ្ញាចិត្តរួមសាមគ្គីគ្នា រៀបចំជំនួបធុរកិច្ចរៀងរាល់ខែ ដើម្បីរួមគ្នាដោះស្រាយបញ្ហាប្រឈមក្នុងវិស័យទេសចរណ៍ និងការជំរុញកំណើនទេសចរអន្តរជាតិមកកម្ពុជា។

ឯកឧត្តម រដ្ឋមន្ត្រី ហួត ហាក់ ថ្លែងថា ជំនួបធុរកិច្ច សមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា ឆ្នាំ២០២៥នេះ គឺមានបំណងសំខាន់ពង្រឹងនិងពង្រីកបណ្តាញធុរកិច្ច ផ្លាស់ប្តូរបទពិសោធន៍ ចែករំលែកនូវបច្ចុប្បន្នភាពថ្មីៗអំពីការវិវត្តនៃវិស័យទេសចរណ៍ក្នុងតំបន់ និងសកលលោក ហើយតាមរយៈជំនួបនេះនឹងប្រែក្លាយបញ្ហាប្រឈមជាកាលានុវត្តដើម្បីបន្តជំរុញកំណើននៅក្នុងវិស័យទេសចរណ៍ និងរក្សានូវភាពប្រកួតប្រជែងខ្ពស់ក្នុងតំបន់ ប្រកបដោយភាពជឿជាក់ ច្នៃប្រឌិត បត់បែនឱ្យទាន់សភាពការណ៍ និងមានភាពប្រយ័ត្នប្រយែងខ្ពស់។

លោកបណ្ឌិត ធួន ស៊ីណាន ប្រធានសមាគទេសចរណ៍អាស៊ីប៉ាស៊ីហ្វិកប្រចាំកម្ពុជា PATACC ថ្លែងថា សម្រាប់សមាគមទេសចរណ៍អាស៊ីប៉ាហ្វិក គឺបាននិងកំពុងបំពេញបេសកកម្មអនុវត្តការងារផ្តោតសំខាន់លើការផ្សព្វផ្សាយទីផ្សារគោលដៅទេសចរណ៍ ការបណ្តុះបណ្តុលជំនាញទេសចរណ៍ និងការតស៊ូមតិក្នុងវិស័យទេសចរណ៍ ហើយតាមរយៈការតាំងចិត្តរៀបចំឲ្យមានជំនួបធុរកិច្ចប្រចាំខែ សមាគម នឹងជំរុញប្រែក្លាយកម្ពុជា ឲ្យជាទីផ្សារទេសចរណ៍ឯករាជ្យ កាត់បន្ថយការពឹងអាស្រ័យទីផ្សារពីប្រទេសនានា។

សូមបញ្ជាក់ថា ជំនួបធុរកិច្ចសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា ឆ្នាំ២០២៥ និងដាក់ផែនការបន្តអនុវត្តក្នុងឆ្នាំ២០២៦ ដែលប្រារព្វនៅភោជនីយដ្ឋានយីសាង ទួលគោគ ល្ងាចថ្ងៃទី៩ ខែមករានេះ គឺមានការចូលរួម ថ្នាក់ដឹកនាំ សហប្រធានក្រុមការងារផ្នែកទេសចរណ៍ ក្រុម “ខ”, ប្រធានសហព័ន្ធទេសចរណ៍កម្ពុជា,តំណាងធនាគារជាតិនៃកម្ពុជា, តំណាងសមាគមសណ្ឋាគារ, សមាគមភោជនីយដ្ឋាន, សមាគមមគ្គុទ្ទេសក៍ទេសចរណ៍, សមាគមសហគ្រិនវ័យក្មេង, និងតំណាងក្រុមហ៊ុនអាកាសចរណ៍ជាតិ មន្ត្រីជំនាញ និង ប្រតិបត្តិករទេសចរណ៍ជាច្រើនក្រុមហ៊ុនទៀត។អត្ថបទ ស៊ុម សុខជា