មនុស្សយ៉ាងហោច ២៩នាក់ ត្រូវបានចាប់ខ្លួននៅរដ្ឋ Minneapolis សហរដ្ឋអាមេរិក អំឡុងបាតុកម្មប្រឆាំងការស្លាប់ស្រ្តីម្នាក់ដែលត្រូវបានបាញ់ប្រហារដោយភ្នាក់ងារអនុវត្តច្បាប់អន្តោប្រវេសន៍ និងគយ(ICE) ។

ក្រុមមន្រ្តីក្រុងនិយាយថា មន្រ្តីនគរបាលម្នាក់ បានរងរបួស ក្រោយដុំទឹកកកត្រូវបានគប់លើពួកគេ អំឡុងបាតុកម្មដែលមើលឃើញមនុស្ស ១ពាន់នាំ ដង្ហែរក្បួនតាមដងផ្លូវ ។

កាលពីថ្ងៃពុធ រដ្ឋ Minneapolis បានក្លាយជាចំណុចក្ដៅនៃប្រតិបត្តិការនិរទេសដោយយោធារបស់ប្រធានាធិបតីខាងគណបក្សសាធារណរដ្ឋ នៅពេលដែលភ្នាក់ងារ ICE បាញ់សម្លាប់អ្នកស្រី Renee Nicole Good វ័យ ៣៧ ។ 

រដ្ឋបាលរបស់លោកប្រធានាធិបតី Donald Trumpនិយាយថា ភ្នាក់ងាររូបនោះ បាញ់ដើម្បីការពារខ្លួនប៉ុណ្ណោះ ខណៈអ្នកស្រុកនិយាយយ៉ាងទទួចថា ស្រ្តីម្នាក់នោះ គ្មានការគំរាមកំហែង ឬគ្រោះថ្នាក់ណាមួយនោះឡើយ ។

អំពើហិង្សាបានកើតឡើងភ្លាមៗ បន្ទាប់ពីមន្ត្រីសហព័ន្ធប្រហែល ២ពាន់នាក់ ត្រូវបានបញ្ជូនទៅទីក្រុង Minneapolis ជាអ្វីដែលក្រសួងសន្តិសុខមាតុភូមិ (DHS) បានចាត់ទុកថា ជាប្រតិបត្តិការ DHS ដ៏ធំបំផុតមិនធ្លាប់មាន ។ 

វីដេអូដែលបានបង្ហោះនៅលើអនឡាញឃើញក្រុមបាតុករបើកភ្លើង ផ្លុំកញ្ចែ និងវាយស្គ ។ នគរបាលនិយាយថា មាននូវបាតុករប្រហែល ១ពាន់នាក់ ហើយពួកគេមួយចំនួន នាំគ្នាចោលដុំទឹកកក ព្រិល និងដុំថ្មលើក្រុមមន្រ្តីនគរបាល រថយន្តនគរបាល និងរថយន្តផ្សេងទៀត ប៉ុន្តែពុំមានករណីរងរបួសធ្ងន់ធ្ងរត្រូវបានរាយការណ៍នោះទេ ។

អភិបាលរដ្ឋ Minnesota លោក Tim Walz ដែលជាសមាជិកគណបក្សប្រជាធិបតេយ្យ បានថ្កោលទោសការដាក់ពង្រាយនេះថា ជាឧទាហរណ៍មិនប្រុងប្រយ័ត្ន ៕