ក្រសួងការពារជាតិកូរ៉េខាងត្បូង និយាយកាលពីថ្ងៃសៅរ៍ថា ពួកគេពុំមានយានដ្រូនដូចដែលកូរ៉េខាងជើងអះអាងថា បានហោះចេញពីកូរ៉េខាងត្បូងនោះទេ ហើយពួកគេបន្តថា ពួកគេក៏គ្មានបំណងបង្ករឿងជាមួយប្រទេសជិតខាងមួយនេះនោះដែរ ។

លោក Kim Hong-cheol គឺជាអនុរដ្ឋមន្រ្តីក្រសួងការពារជាតិកូរ៉េខាងត្បូង និយាយនៅក្នុងសេចក្តីថ្លែងការណ៍ជាការឆ្លើយឆ្លើយនឹងអំណះអំណាងរបស់កូរ៉េខាងជើងថា ជាលទ្ធផលនៃការស៊ើបអង្កេតដំបូង យោធារបស់ពួកយើង ពុំមានយានដ្រូនដូចដែលកូរ៉េខាងជើងអះអាងនោះទេ ហើយក៏គ្មានកំណត់ហេតុបង្ហាញថា ពួកយើងប្រើប្រាស់យានគ្មានមនុស្សបើកណាមួយនៅពេលនោះ នៅថ្ងៃដែលកូរ៉េខាងជើងប្រកាសនោះដែរ ។

លោក Kim បន្តថា ទីក្រុងសេអ៊ូលនឹងបន្តកិច្ចខិតខំ ក្នុងគោលបំណងបន្ធូរបន្ថយភាពតានតឹង និងបង្កើតទំនុកចិត្តនៅឧបទ្វីបកូរ៉េ ។

លោកថា ពួកយើងគ្មានបំណងបង្ករឿង ឬញុះញង់កូរ៉េខាងជើងនោះទេ ហើយពួកយើងនឹងបន្តចាត់វិធានការរឹងមាំ និងកិច្ចខិតខំជាបន្តបន្ទាប់ ដើម្បីបន្ធូរបន្ថយភាពតានតឹង និងបង្កើតទំនុកចិត្តរវាងប្រទេសទាំង ២ ។

គួរឲ្យដឹងថា សារព័ត៌មានកូរ៉េខាងជើង រាយការណ៍កាលពីថ្ងៃសៅរ៍ថា កូរ៉េខាងត្បូង បង្ហោះយានដ្រូនមួយគ្រឿងទៀត ចូលទៅក្នុងដែនអាកាសរបស់ខ្លួនកាលពីថ្ងៃទី ៤ ខែមករា រំលោភលើអធិបតេយ្យភាពរបស់ខ្លួន ដោយពួកគេរាយការណ៍ថា យានដ្រូននេះ មានប្រភពមកពីកោះមួយនៅទីក្រុង Incheon ហើយនិងហោះបានចម្ងាយ ៨គ.ម មុនពេលត្រូវបានបាញ់ទម្លាក់ ៕