យោងតាមប្រភពព័ត៌មានអ៊ីស្រាអែលចំនួន៣ ដែលដឹងពីបញ្ហានេះ បាននិយាយថា អ៊ីស្រាអែល កំពុងប្រុងជើងការ និងត្រៀមលក្ខណៈខ្ពស់ចំពោះលទ្ធភាពនៃអន្តរាគមន៍ណាមួយរបស់សហរដ្ឋអាមេរិក នៅក្នុងប្រទេសអ៊ីរ៉ង់ ខណៈអាជ្ញាធរនៅទីនោះកំពុងប្រឈមមុខនឹងការតវ៉ាប្រឆាំងរដ្ឋាភិបាលដ៏ធំបំផុតក្នុងរយៈពេលជាច្រើនឆ្នាំ។

គួរឱ្យដឹងថា ក្នុងប៉ុន្មានថ្ងៃថ្មីៗនេះ ប្រធានាធិបតីអាមេរិក លោក Donald Trump បានគំរាមម្តងហើយម្តងទៀតថា នឹងធ្វើអន្តរាគមន៍ ហើយព្រមានថ្នាក់ដឹកនាំអ៊ីរ៉ង់ កុំឱ្យប្រើកម្លាំងប្រឆាំងនឹងក្រុមបាតុករ។ កាលពីថ្ងៃសៅរ៍ (១០ មករា) លោក Trump បាននិយាយថា សហរដ្ឋអាមេរិក «ត្រៀមខ្លួនជួយ» ក្រុមបាតុករ។

ប្រភពទាំងនោះ ដែលមានវត្តមានក្នុងការពិគ្រោះយោបល់សន្តិសុខអ៊ីស្រាអែលកាលពីចុងសប្តាហ៍កន្លងទៅ មិនបានពន្យល់លម្អិតឡើយអំពីអត្ថន័យជាក់ស្តែងនៃការប្រុងជើងការខ្ពស់របស់អ៊ីស្រាអែលនោះ។ អ៊ីស្រាអែល និងអ៊ីរ៉ង់ ធ្លាប់ប្រយុទ្ធគ្នាក្នុងសង្គ្រាម ១២ថ្ងៃ កាលពីខែមិថុនា ឆ្នាំមុន ដែលសហរដ្ឋអាមេរិក ក៏បានចូលរួមជាមួយអ៊ីស្រាអែល ក្នុងការបើកការវាយប្រហារតាមអាកាសផងដែរ។

ប្រភពអ៊ីស្រាអែលបានឱ្យដឹងថា នាយករដ្ឋមន្ត្រីអ៊ីស្រាអែល លោក Benjamin Netanyahu និងរដ្ឋមន្ត្រីការបរទេសអាមេរិក លោក Marco Rubio បានសន្ទនាតាមទូរសព្ទកាលពីថ្ងៃសៅរ៍ ដោយពិភាក្សាពីលទ្ធភាពនៃអន្តរាគមន៍នៅអ៊ីរ៉ង់បែបនេះ។ ប្រភពមន្ត្រីអាមេរិកម្នាក់បានបញ្ជាក់ពីកិច្ចសន្ទនានោះ ប៉ុន្តែមិនលម្អិតឡើយថា ភាគីទាំងពីរពិភាក្សាអំពីប្រធានបទអ្វី។

អ៊ីស្រាអែល មិនបានបង្ហាញសញ្ញានៃបំណងចង់អន្តរាគមន៍នៅអ៊ីរ៉ង់ទេ ខណៈការតវ៉ាកំពុងគ្របដណ្ដប់ប្រទេសនេះ ស្របពេលភាពតានតឹងរវាងសត្រូវទាំងពីរក៏កើនឡើងកាន់តែខ្ពស់ ដោយសារតែក្ដីបារម្ភរបស់អ៊ីស្រាអែល អំពីកម្មវិធីនុយក្លេអ៊ែរ និងមីស៊ីលបាលីស្ទិករបស់អ៊ីរ៉ង់៕