នៅក្នុងសេចក្តីថ្លែងការណ៍មួយដែលចេញផ្សាយដោយប្រព័ន្ធផ្សព្វផ្សាយរដ្ឋ KCNA នៅថ្ងៃអាទិត្យ (១១ មករា) នេះ លោកស្រី គីម យ៉ូជុង (Kim Yo Jong) ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង គីម ជុងអ៊ុន បានជំរុញឱ្យកូរ៉េខាងត្បូង ស៊ើបអង្កេតលើឧប្បត្តិហេតុយានដ្រូនថ្មីៗនេះលើដែនអាកាសកូរ៉េខាងជើង។

លោកស្រី គីម បាននិយាយថា លោកស្រីកោតសរសើរទីក្រុងសេអ៊ូល ដែលបានធ្វើការសម្រេចដ៏ឈ្លាសវៃមួយក្នុងការប្រកាសជំហរផ្លូវការរបស់ខ្លួនថា ខ្លួនគ្មានចេតនាញុះញង់ឡើយ ដោយព្រមានថា ការញុះញង់ណាមួយនឹងនាំឱ្យមានស្ថានភាពដ៏អាក្រក់។ លោកស្រីបន្តថា៖ មិនថាជនល្មើសជាអង្គការស៊ីវិល ឬបុគ្គលនោះទេ អាជ្ញាធរដែលទទួលខុសត្រូវចំពោះសន្តិសុខជាតិ មិនអាចគេចវេះពីការទទួលខុសត្រូវរបស់ពួកគេបានឡើយ។

យោធាកូរ៉េខាងជើង បាននិយាយកាលពីថ្ងៃសៅរ៍ថា ដ្រូនជាច្រើនគ្រឿងត្រូវបានបង្ហោះពីកូរ៉េខាងត្បូង ចូលទៅកូរ៉េខាងជើង នៅដើមខែនេះ បន្ទាប់ពីការជ្រៀតចូលដែនអាកាសមួយផ្សេងទៀតក្នុងខែកញ្ញា កន្លងទៅ ដែលនៅពេលនោះ កូរ៉េខាងត្បូងឆ្លើយតបថា អាកាសយានទាំងនោះមិនត្រូវបានដំណើរការដោយយោធាទេ។

កូរ៉េខាងត្បូងក៏បាននិយាយផងដែរថា នឹងមានការស៊ើបអង្កេតយ៉ាងហ្មត់ចត់លើជនស៊ីវិលម្នាក់ ដែលប្រហែលជាអ្នកបញ្ជាដ្រូននោះ ដោយបញ្ជាក់ច្បាស់ៗពីជំហររបស់ខ្លួនថា ពុំមានចេតនាញុះញង់ឡើយ។ ការិយាល័យសន្តិសុខជាតិកូរ៉េខាងត្បូង បាននិយាយនៅថ្ងៃអាទិត្យនេះថា ខ្លួននឹងចេញផ្សាយលទ្ធផលស៊ើបអង្កេតឱ្យឆាប់រហ័ស ទៅលើឧប្បត្តិហេតុយានដ្រូននេះ ខណៈបញ្ជាក់ជាថ្មីនូវជំហររបស់រដ្ឋាភិបាលថា ពុំមានចេតនាញុះញង់កូរ៉េខាងជើងនោះទេ៕