អ៊ីរ៉ង់បានព្រមានថាខ្លួននឹងសងសឹកប្រសិនបើត្រូវបានវាយប្រហារដោយសហរដ្ឋអាមេរិក ខណៈប្រភពនានាពីទូរទស្សន៍ BBC និងក្រុមសកម្មជនរាយការណ៍ថា អ្នកតវ៉ារាប់រយនាក់ត្រូវបានសម្លាប់នៅក្នុងការបង្ក្រាបរបស់រដ្ឋាភិបាលដែលកំពុងកើនឡើង។

ប្រភពមួយនៅទីក្រុងតេអេរ៉ង់បាននិយាយកាលពីថ្ងៃអាទិត្យថា ស្ថានការណ៍នៅទីនេះគឺធ្ងន់ធ្ងរខ្លាំងណាស់។ មិត្តភក្តិរបស់ពួកគេជាច្រើនត្រូវបានសម្លាប់។ កងកម្លាំងសន្តិសុខអ៊ីរ៉ង់កំពុងបាញ់គ្រាប់ពិត។ វាដូចជាតំបន់សង្គ្រាម ផ្លូវថ្នល់ពោរពេញដោយឈាម។ ពួកគេកំពុងដឹកសាកសពចេញតាមរថយន្តដឹកទំនិញ។

BBCបានរាប់ថង់សាកសពប្រហែល១៨០នាក់នៅក្នុងវីដេអូពីកន្លែងដាក់សពមួយក្បែរទីក្រុងតេអេរ៉ង់។ទីភ្នាក់ងារព័ត៌មានសកម្មជនសិទ្ធិមនុស្សមានមូលដ្ឋាននៅសហរដ្ឋអាមេរិកនិយាយថា ខ្លួនបានផ្ទៀងផ្ទាត់ការស្លាប់របស់អ្នកតវ៉ាចំនួន ៤៩៥នាក់ និងបុគ្គលិកសន្តិសុខចំនួន៤៨ នាក់ទូទាំងប្រទេស។

ទីភ្នាក់ងារនេះនិយាយថា មនុស្ស ១០.៦០០ នាក់ផ្សេងទៀតត្រូវបានឃុំខ្លួនក្នុងរយៈពេលពីរសប្តាហ៍នៃភាពចលាចលនេះ។

សហរដ្ឋអាមេរិកបានគំរាមវាយប្រហារអ៊ីរ៉ង់ជុំវិញការសម្លាប់អ្នកតវ៉ា ហើយប្រធានាធិបតី Trump បាននិយាយកាលពីថ្ងៃសៅរ៍ថា សហរដ្ឋអាមេរិក ត្រៀមខ្លួនជួយ ខណៈអ៊ីរ៉ង់កំពុងសម្លឹងមើលសេរីភាព។

លោក Trump មិនបានពន្យល់លម្អិតអំពីអ្វីដែលសហរដ្ឋអាមេរិកកំពុងពិចារណានោះទេ។ លោកត្រូវបានជូនដំណឹងអំពីជម្រើសសម្រាប់ការវាយប្រហារដោយយោធាលើប្រទេសអ៊ីរ៉ង់ នេះបើយោងតាមមន្ត្រីមួយរូបបានប្រាប់សារព័ត៌មាន CBS ដែលជាដៃគូព័ត៌មានអាមេរិករបស់ BBC។

ប្រធានសភាអ៊ីរ៉ង់បានព្រមានថា ប្រសិនបើសហរដ្ឋអាមេរិកវាយប្រហារ ទាំងអ៊ីស្រាអែល និងមជ្ឈមណ្ឌលយោធា និងនាវាចរណ៍របស់សហរដ្ឋអាមេរិក នៅក្នុងតំបន់នេះ នឹងក្លាយជាគោលដៅស្របច្បាប់៕