ប្រធានាធិបតីអាមេរិក លោក Donald Trump បានចេញការព្រមានថ្មីមួយទៀតកាលពីថ្ងៃអាទិត្យ (១១ មករា) ថា លោកកំពុងតែថ្លឹងថ្លែងពីការឆ្លើយតបដ៏ខ្លាំងក្លាជាច្រើនចំពោះភាពចលាចលដ៏កម្រោលដែលកំពុងតែឡើងកម្ដៅនៅក្នុងប្រទេសអ៊ីរ៉ង់ រួមទាំងលទ្ធភាពនៃជម្រើសយោធា ខណៈការតវ៉ាទ្រង់ទ្រាយធំនៅតែបន្តរីករាលដាលពាសពេញប្រទេសអ៊ីរ៉ង់។

កាលពីថ្ងៃអាទិត្យដដែលនោះ កាសែត Wall Street Journal បានរាយការណ៍ដោយដកស្រង់សម្តីពីក្រុមមន្ត្រីអាមេរិកថា បណ្ដាមន្ត្រីជាន់ខ្ពស់នៅក្នុងរដ្ឋបាលទីក្រុងវ៉ាស៊ីនតោន នឹងសង្ខេបប្រាប់លោក Trump នៅថ្ងៃអង្គារ ទី១៣ ខែធ្នូ ស្អែកនេះ (ពេលវេលានៅសហរដ្ឋអាមេរិក) អំពីជម្រើសជាក់លាក់ ដើម្បីឆ្លើយតបទៅនឹងបាតុកម្មនៅអ៊ីរ៉ង់។

សេចក្ដីរាយការណ៍បន្តថា កិច្ចប្រជុំនេះនឹងក្លាយជាការពិភាក្សាអំពីលទ្ធភាពនៃជំហានបន្ទាប់មួយចំនួនលើអ៊ីរ៉ង់ រួមទាំងការវាយប្រហារដោយយោធា ការដាក់ពង្រាយអាវុធសម្ងាត់តាមអ៊ីនធឺណិតប្រឆាំងនឹងទីតាំងយោធា និងស៊ីវិលរបស់អ៊ីរ៉ង់ ដាក់ទណ្ឌកម្មបន្ថែមទៀតលើរដ្ឋាភិបាលអ៊ីរ៉ង់ និងការបង្កើនប្រភពប្រឆាំងរដ្ឋាភិបាលតាមបណ្ដាញអ៊ីនធឺណិតជាដើម។

សេតវិមានបាននិយាយថា ខ្លួនមិនមានការអត្ថាធិប្បាយលើរបាយការណ៍នេះទេ។ លោក Trump ដែលក្នុងប៉ុន្មានថ្ងៃថ្មីៗនេះបានគំរាមម្តងហើយម្តងទៀតថានឹងធ្វើអន្តរាគមន៍ បានបង្ហោះសារលើបណ្តាញសង្គមកាលពីថ្ងៃសៅរ៍ថា «អ៊ីរ៉ង់កំពុងសម្លឹងមើលសេរីភាព ដែលប្រហែលជាមិនធ្លាប់មានពីមុនមក ហើយសហរដ្ឋអាមេរិក ត្រៀមខ្លួនជួយ!!!» ដោយមិនបញ្ជាក់លម្អិតនោះទេ។ ទីក្រុងតេអេរ៉ង់ព្រមានថា ខ្លួននឹងវាយប្រហារមូលដ្ឋានយោធាអាមេរិក ប្រសិនបើអាមេរិក វាយប្រហារលើអ៊ីរ៉ង់ជាថ្មីម្ដងទៀត៕