កាលថ្ងៃអាទិត្យ (១១ មករា) សមាជិកសភាសហរដ្ឋអាមេរិកមួយចំនួន នៅក្នុងគណបក្សធំៗទាំងពីរ បានសម្ដែងការសង្ស័យរបស់ពួកគេ ដោយចោទសួរថា តើសកម្មភាពយោធាប្រឆាំងនឹងអ៊ីរ៉ង់ គឺជាវិធីសាស្រ្តដ៏ល្អបំផុតសម្រាប់សហរដ្ឋអាមេរិកដែរឬទេ ខណៈដែលអាជ្ញាធរអ៊ីរ៉ង់ ប្រឈមមុខនឹងភាពចលាចលកាន់តែខ្លាំងឡើងនៅក្នុងប្រទេស។

ក្នុងប៉ុន្មានថ្ងៃថ្មីៗនេះ ប្រធានាធិបតីអាមេរិក លោក Donald Trump បានបើកចំហលើលទ្ធភាពនៃអន្តរាគមន៍របស់អាមេរិក នៅអ៊ីរ៉ង់ ជាទីដែលការតវ៉ាប្រឆាំងរដ្ឋាភិបាលដ៏ធំបំផុតក្នុងរយៈពេលជាច្រើនឆ្នាំមកនេះ បានបណ្ដាលឱ្យមានអ្នកស្លាប់រាប់រយនាក់ ហើយក៏នាំឱ្យកងឆ្មាំបដិវត្តន៍ស្តីបន្ទោសភាពចលាចលទៅលើក្រុមភេរវករ និងប្ដេជ្ញាចាត់វិធានការការពារប្រព័ន្ធអភិបាលកិច្ចរបស់ខ្លួន។

ប៉ុន្តែព្រឹទ្ធសមាជិកអាមេរិកមួយចំនួន បានព្រមានឱ្យប្រុងប្រយ័ត្ន ក្នុងអំឡុងបទសម្ភាសន៍កាលពីថ្ងៃអាទិត្យ លើបណ្តាញទូរទស្សន៍។ លោក Rand Paul ព្រឹទ្ធសមាជិកមកពីបក្សសាធារណរដ្ឋរបស់លោក Trump ផ្ទាល់ បាននិយាយក្នុងកម្មវិធីទូរទស្សន៍ ABC ថា "លោកមិនដឹងថាការទម្លាក់គ្រាប់បែកលើអ៊ីរ៉ង់ នឹងមានឥទ្ធិពលដូចការគ្រោងទុកឬអត់នោះទេ"។

លោក Paul និងលោក Mark Warner ដែលជាព្រឹទ្ធសមាជិកមកពីបក្សប្រជាធិបតេយ្យ បាននិយាយថា «ជំនួសឱ្យការធ្វើឱ្យរបបនេះចុះខ្សោយ ការវាយប្រហារដោយយោធាលើអ៊ីរ៉ង់ អាចនឹងប្រមូលផ្តុំប្រជាជនឱ្យប្រឆាំងនឹងសត្រូវខាងក្រៅទៅវិញនោះទេ»។ ទីក្រុងតេអេរ៉ង់បានព្រមានរួចមកហើយថា ខ្លួននឹងវាយប្រហារមូលដ្ឋានយោធាអាមេរិក ប្រសិនបើអាមេរិកវាយប្រហារលើអ៊ីរ៉ង់ជាថ្មីម្ដងទៀត៕