យោងតាមក្រុមមន្ត្រី យុទ្ធជនចុងក្រោយមកពីកងកម្លាំងប្រជាធិបតេយ្យស៊ីរី (SDF) ដឹកនាំដោយក្រុមជនជាតិភាគតិចឃឺដ បានចាកចេញពីទីក្រុង Aleppo បន្ទាប់ពីកិច្ចព្រមព្រៀងឈប់បាញ់ដែលអនុញ្ញាតឱ្យមានការជម្លៀសចេញ បន្ទាប់ពីការប៉ះទង្គិចគ្នាដ៏សាហាវអស់រយៈពេលជាច្រើនថ្ងៃនៅក្នុងទីក្រុងធំបំផុតទីពីររបស់ប្រទេសស៊ីរី។

អភិបាលក្រុងAleppo លោក Azzam al-Gharib បានប្រាប់សារព័ត៌មាន Al Jazeera កាលពីព្រឹកថ្ងៃអាទិត្យថា ទីក្រុងនេះបានក្លាយជាទទេស្អាតដោយសារយុទ្ធជន SDF បន្ទាប់ពីកងកម្លាំងរដ្ឋាភិបាលបានសម្របសម្រួលការដកថយរបស់ពួកគេតាមរថយន្តក្រុងចេញពីទីក្រុងនេះពេញមួយយប់។

មេបញ្ជាការ SDF លោក Mazloum Abdi ដែលត្រូវបានគេស្គាល់ផងដែរថា  Mazloum Kobaniបាននិយាយថា ក្រុមនេះបានឈានដល់ការយោគយល់គ្នាតាមរយៈការសម្របសម្រួលអន្តរជាតិលើបទឈប់បាញ់ និងការជម្លៀសជនស៊ីវិល និងក្រុមប្រយុទ្ធជនដោយសុវត្ថិភាព។

លោក Abdi បាននិយាយក្នុងសារមួយលើបណ្ដាញសង្គម X ថា ពួកលោកបានឈានដល់ការយោគយល់គ្នាមួយដែលនាំទៅរកបទឈប់បាញ់ និងធានាការជម្លៀសអ្នកស្លាប់ អ្នករបួស ជនស៊ីវិលដែលជាប់ខ្លួន និងយុទ្ធជនចេញពីសង្កាត់ Ashrafieh និង Sheikh Maqsoud ទៅកាន់ភាគខាងជើង និងភាគខាងកើតប្រទេសស៊ីរី។

លោកបានបន្ថែមថា ពួកលោកសូមអំពាវនាវដល់ក្រុមអ្នកសម្របសម្រួលឱ្យប្រកាន់ខ្ជាប់នូវការសន្យារបស់ពួកគេដើម្បីបញ្ឈប់ការរំលោភបំពាន និងធ្វើការឆ្ពោះទៅរកការវិលត្រឡប់ដោយសុវត្ថិភាពសម្រាប់ជនភៀសខ្លួនទៅកាន់ផ្ទះសម្បែងរបស់ពួកគេវិញ៕