សារព័ត៌មាន Wall Street Journal បានរាយការណ៍កាលពីថ្ងៃសៅរ៍ (១០ មករា) ថា អ៊ីស្រាអែល និងក្រុមសកម្មប្រយុទ្ធហាម៉ាស កំពុងត្រៀមខ្លួនសម្រាប់ការប្រយុទ្ធគ្នាជាថ្មីម្ដងទៀត ខណៈក្រុមយុទ្ធជនប៉ាឡេស្ទីនមួយនេះ កំពុងបដិសេធមិនព្រមរំសាយអាវុធនោះឡើយ ដែលជាឧបសគ្គមួយរារាំងវឌ្ឍនភាពលើផែនការសន្តិភាពរបស់លោកប្រធានាធិបតីអាមេរិក Donald Trump សម្រាប់តំបន់ហ្កាហ្សា។

នៅខាងអ៊ីស្រាអែល ប្រភពព័ត៌មានដែលដឹងពីផែនការនេះបាននិយាយថា យោធាអ៊ីស្រាអែល បានរៀបចំផែនការសម្រាប់ប្រតិបត្តិការជើងគោកថ្មីមួយ នៅទីតាំងដែលគ្រប់គ្រងដោយក្រុមហាម៉ាស ក្នុងតំបន់ហ្កាហ្សា។ ចំណែកក្រុមហាម៉ាសវិញ កំពុងផ្តោតលើការកសាងសមត្ថភាពយោធាឡើងវិញ ដែលបានបាត់បង់ក្នុងអំឡុងសង្គ្រាម រួមទាំងផ្នែកខ្លះនៃហេដ្ឋារចនាសម្ព័ន្ធផ្លូវរូងក្រោមដី ដែលបានខូចខាតរបស់ខ្លួនផងដែរ នេះបើតាមប្រភពមន្ត្រីអារ៉ាប់ និងអ៊ីស្រាអែល។

ប្រមុខនាយសេនាធិការយោធាអ៊ីស្រាអែល លោក Eyal Zamir កាលពីខែវិច្ឆិកា ឆ្នាំ២០២៥ បាននិយាយរួចមកហើយថា អ៊ីស្រាអែល «ត្រូវតែត្រៀមខ្លួនដើម្បីផ្លាស់ប្តូរយ៉ាងឆាប់រហ័ស ទៅកាន់ការវាយប្រហារយ៉ាងទូលំទូលាយ ទូទាំងផ្នែកម្ខាងទៀតនៃបន្ទាត់ពណ៌លឿង» ដោយសំដៅទៅលើទឹកដីដែលគ្រប់គ្រងដោយក្រុមហាម៉ាស។

មន្ត្រីអារ៉ាប់និយាយថា ក្រុមហាម៉ាស បើកចំហចំពោះការបោះបង់អាវុធធុនធ្ងន់ដែលនៅសេសសល់របស់ខ្លួន ប៉ុន្តែនឹងមិនប្រគល់អាវុធធុនតូចឡើយ។ អ៊ីស្រាអែលប៉ាន់ប្រមាណថា ក្រុមនេះនៅមានកាំភ្លើងវែងចំនួន ៦ម៉ឺនដើម និងយុទ្ធជន ២ម៉ឺននាក់។ មន្ត្រីអ៊ីស្រាអែលម្នាក់និយាយថា ប្រសិនបើក្រុមហាម៉ាស មិនព្រមលះបង់អាវុធរបស់ខ្លួនទេ នោះអ៊ីស្រាអែលនឹងចាត់វិធានការបង្ខំឱ្យពួកគេធ្វើដូច្នេះ៕