រដ្ឋមន្ត្រីក្រសួងរតនាគារអាមេរិក លោក Scott Bessent បានប្រាប់ទីភ្នាក់ងារសារព័ត៌មានរ៉យទ័រកាលពីថ្ងៃសុក្រ (៩ មករា) សប្ដាហ៍មុនថា ទណ្ឌកម្មបន្ថែមរបស់សហរដ្ឋអាមេរិក លើវ៉េណេស៊ុយអេឡា អាចត្រូវបានដកចេញក្នុងសប្តាហ៍នេះ ដើម្បីជួយសម្រួលដល់ការលក់ប្រេង ហើយលោកក៏នឹងជួបជាមួយប្រធានមូលនិធិរូបិយវត្ថុអន្តរជាតិ IMF និងធនាគារពិភពលោក នៅសប្តាហ៍នេះផងដែរ ស្តីពីការចូលរួមឡើងវិញរបស់ពួកគេជាមួយវ៉េណេស៊ុយអេឡា។

ក្នុងបទសម្ភាសន៍នោះ លោក Bessent បាននិយាយថា ទ្រព្យសកម្មរូបិយវត្ថុតម្លៃជិត ៥ពាន់លានដុល្លារ របស់វ៉េណេស៊ុយអេឡា ដែលត្រូវបានបង្កកនាពេលបច្ចុប្បន្ន នៅក្នុងសិទ្ធិដកប្រាក់ពិសេស (SDR) ឬគេស្គាល់ថាជា ទ្រព្យបំរុងអន្តរជាតិ របស់មូលនិធិ IMF អាចត្រូវបានប្រើប្រាស់ដើម្បីជួយកសាងសេដ្ឋកិច្ចរបស់ប្រទេសអាមេរិកខាងត្បូងមួយនេះឡើងវិញ។

ចំណាត់ការទាំងនេះគឺជាផ្នែកមួយនៃកិច្ចប្រឹងប្រែងរបស់រដ្ឋបាលលោកប្រធានាធិបតីអាមេរិក Donald Trump ដើម្បីធ្វើឱ្យវ៉េណេស៊ុយអេឡា មានស្ថិរភាព និងលើកទឹកចិត្តដល់ការវិលត្រឡប់របស់ក្រមហ៊ុនផលិតប្រេងអាមេរិក ទៅកាន់ប្រទេសនេះវិញ បន្ទាប់ពីកងកម្លាំងអាមេរិក បានចាប់ខ្លួនមេដឹកនាំវ៉េណេស៊ុយអេឡា លោក Nicolas Maduro នៅទីក្រុងការ៉ាកាស។

បច្ចុប្បន្ន វ៉េណេស៊ុយអេឡា មានរូបិយបណ្ណប្រហែល ៣,៥៩ ពាន់លាន នៅក្នុងសិទ្ធិដកប្រាក់ពិសេស SDR ដែលមានតម្លៃប្រហែល ៤,៩ ពាន់លានដុល្លារអាមេរិក គិតត្រឹមអត្រាប្តូរប្រាក់ថ្ងៃសុក្រសប្ដាហ៍មុន ប៉ុន្តែបច្ចុប្បន្ន ប្រទេសនេះមិនអាចចូលប្រើប្រាស់រូបិយបណ្ណទាំងនោះបានឡើយ។ គួរឱ្យដឹងថា ទ្រព្យបំរុងអន្តរជាតិ SDR នោះ ត្រូវបានបង្កើតឡើងដោយប្រាក់ដុល្លាររបស់អាមេរិក ប្រាក់អឺរ៉ូរបស់អឺរ៉ុប ប្រាក់យ៉េនរបស់ជប៉ុន ប្រាក់ផោនរបស់អង់គ្លេស និងប្រាក់យ័នរបស់ចិន៕