ក្រុមបាតុករបានមកប្រមូលផ្តុំគ្នានៅទីក្រុងឡុងដ្រ៍ចក្រភពអង់គ្លេស ទីក្រុងប៉ារីសប្រទេសបារាំង និងទីក្រុងអ៊ីស្តង់ប៊ុលប្រទេសទួរគី កាលពីថ្ងៃអាទិត្យ ទី១១ ខែមករា ក្នុងការគាំទ្រការតវ៉ានៅប្រទេសអ៊ីរ៉ង់ដែលត្រូវបានឆ្លើយតបដោយការបង្ក្រាបដ៏បង្ហូរឈាមពីកងកម្លាំងសន្តិសុខរបស់ប្រទេស។ បាតុកម្មនៅទីក្រុងឡុងដ្រ៍ ដំបូងឡើយនៅមុខស្ថានទូតអ៊ីរ៉ង់និងក្រោយមកនៅមុខលំនៅឋានរបស់នាយករដ្ឋមន្ត្រីអង់គ្លេស ដែលបានកើនឡើងរហូតដល់មានមនុស្សរាប់ពាន់នាក់។

អ្នកស្រី Afsi ជនជាតិអ៊ីរ៉ង់អាយុ៣៨ ឆ្នាំ បានប្រាប់សារព័ត៌មាន AFP នៅក្នុងការជួបជុំគ្នានៅមុខ ការិយាល័យDowning Street ថា «យើងចង់បានបដិវត្តន៍ ការផ្លាស់ប្តូររបប»។ អ្នកស្រី Afsi បានរស់នៅក្នុងទីក្រុងឡុងដ្រ៍រយៈពេល៧ឆ្នាំមកហើយ ហើយពុំអាចទាក់ទងជាមួយក្រុមគ្រួសាររបស់អ្នកស្រីនៅអ៊ីរ៉ង់បានទេ ដោយសារតែការកាត់ផ្តាច់អ៊ីនធឺណិតដែលធ្វើឡើងដោយអាជ្ញាធរចាប់តាំងពីថ្ងៃព្រហស្បតិ៍ សប្តាហ៍មុន។

អ្នកស្រីនិយាយថា «វាពិតជាខកចិត្តខ្លាំង ប៉ុន្តែវាពុំមែនជាលើកទីមួយទេ»។ «លើកនេះ យើងមានសង្ឃឹមយើងគិតថាយើងអាចធ្វើវាបានចំពោះការផ្តួលរំលំរដ្ឋាភិបាល»។

នៅទីក្រុងប៉ារីស មនុស្សជាង ២.០០០ នាក់ ដែលកំពុងគ្រវីទង់ជាតិអ៊ីរ៉ង់ ធ្វើបាតុកម្មបានស្រែកថា «ទេចំពោះសាធារណរដ្ឋអ៊ីស្លាមភេរវករ»។