ភ្នំពេញ៖ អគ្គនាយកដ្ឋានពន្ធដារ នឹងដាក់ឲ្យប្រើប្រាស់ប្រព័ន្ធគ្រប់គ្រងលេខកូដ សម្គាល់អចលនទ្រព្យនាពេលខាងមុខ។ តាមរយៈប្រព័ន្ធនេះ គឺមានគោលបំណងដើម្បីឲ្យមានតម្លាភាពសម្រាប់អ្នកបង់ពន្ធ។ ចំពោះក្រុមហ៊ុនសាងសង់បុរី ឬផ្ទះល្វែង បើមិនបង់ពន្ធ មិនអាចកាត់ឈ្មោះផ្ទេរកម្មសិទ្ធិបានឡើយ។

ក្នុងកិច្ចសម្ភាសន៍ជាមួយទូរទស្សន៍ព័ត៌មាន ប៊ីធីវី កាលពីល្ងាចថ្ងៃទី៨ មីនា ឆ្នាំ២០២២កន្លងទៅ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមាន​ប្រសាសន៍​ថា ប្រទេសកាន់តែរីកចម្រើន ​ការស្វែងរកលំនៅឋានឲ្យមានភាពងាយស្រួល ត្រូវតែ​មាន​ប្រព័ន្ធគ្រប់គ្រងទិន្នន័យឲ្យល្អនិងត្រឹមត្រូវ ​ព្រោះថា​បណ្តាប្រទេសផ្សេងៗទៀត គេមានរួចអស់​ទៅហើយ។

លោកបន្តថា ជាទូទៅម្ចាស់បុរីភាគច្រើន គាត់បាន​គោរព​តាមគោលនយោបាយបង់ពន្ធទៅ​តាមការ​កំណត់​យ៉ាងល្អប្រសើរ ​ជាពិសេសតាមប្រព័ន្ធ​ទិន្នន័យ​សព្វថ្ងៃនេះ ដែល​រដ្ឋាភិបាល​បានដាក់​ឲ្យ​ប្រើប្រាស់​រួចហើយ ​តាមរយៈ ឃ្យូអរកូដ (QR Code) នៃប្លង់។

ដោយឡែកលោកតំណាងឲ្យបុរីសុខសាន្តភ្នំពេញ ​បានឱ្យដឹងថា ​គិតចាប់ពីដំណើរការសាងសង់ផ្ទះ​សម្រាប់​លក់រហូតមកទល់បច្ចុប្បន្ននេះ ​សម្រេច​បានចំនួនប្រមាណជាង ​៣ពាន់ខ្នងផ្ទះហើយ ដោយ​មានការ​បង់ពន្ធយ៉ាង​ត្រឹមត្រូវ​តាមការកំណត់របស់រដ្ឋ ព្រោះថា នេះជាកាតព្វកិច្ចទាំង​អស់គ្នាត្រូវ​តែ​គោរពតាម​ ដើម្បីរួមចំណែកក្នុងការ​អភិវឌ្ឍន៍​សេដ្ឋកិច្ចជាតិ​ឲ្យកាន់តែរីកចម្រើនថែមទៀត។

សូមជម្រាបជូនថា ​នៅក្នុងខែឧសភា ​ឆ្នាំ២០២២ខាងមុខនេះ ​អគ្គនាយកដ្ឋានពន្ធដារ នឹងដាក់ឲ្យ​ប្រើប្រាស់​ប្រព័ន្ធគ្រប់គ្រងលេខកូដសម្គាល់អចលនទ្រព្យ ​នៅ​ពេលដែលក្រុមហ៊ុន ​សហគ្រាស ដែល​សាងសង់ជាបុរី ​ឬសាងសង់ជាផ្ទះ ​បើថា​អត់បានមកបង់ពន្ធ ​ហើយអត់មានលេខ ​Tax QR ​កូដទេ មានន័យថា​ មកកាត់ឈ្មោះលក់អត់ចេញទេ។

ដើម្បីមានភាពស្មើគ្នា អគ្គនាយកដ្ឋានពន្ធដារ ​បានរៀបចំកម្មវិធីខាងលើនេះ ​ដោយមាន​ ឃ្យូអរ កូដ រាល់ផ្ទះនីមួយៗ ដែលអភិវឌ្ឍន៍ទៅចេញជាប្រព័ន្ធ ដើម្បីឲ្យដឹងថា ​អ្នកនឹងមកទិញផ្ទះពីម្ចាស់បុរី មានអី ឃ្យូអរ កូដហើយ ​បើអ្នកណាទិញដោយគ្មាន ឃ្យូអរ កូដនេះ ​មានន័យថា ​ម្ចាស់បុរីអត់បង់ពន្ធ និង​អត់បានចុះបញ្ជីនោះទេ៕អត្ថបទ៖ ឈិត បូរ៉ាវី