រដ្ឋមន្ត្រីការបរទេសអ៊ីស្រាអែល លោក Gideon Sa'ar បាននិយាយថា ប្រទេសនេះកាលពីថ្ងៃអាទិត្យ បានជំរុញឲ្យសហភាពអឺរ៉ុបកំណត់ឆ្មាំបដិវត្តន៍ឥស្លាមអ៊ីរ៉ង់ (IRGC)ថា ជាអង្គការភេរវកម្ម។ 

លោក Sa'ar បាននិយាយថា លោកបានលើកឡើងពីបញ្ហានេះ នៅក្នុងកិច្ចប្រជុំមួយនៅទីក្រុងហ្ស៊េរុយសាឡឹមជាមួយរដ្ឋមន្ត្រីក្រសួងមហាផ្ទៃអាល្លឺម៉ង់ លោក Alexander Dobrindt ដោយប្រាប់លោកថា៖«ឥឡូវនេះជាពេលវេលា ដើម្បីកំណត់ឆ្មាំបដិវត្តន៍អ៊ីរ៉ង់ថា ជាអង្គការភេរវកម្មនៅក្នុងសហភាពអឺរ៉ុប»។

លោក Sa'ar បាននិយាយថា៖«នេះគឺជាជំហររបស់អាល្លឺម៉ង់ជាយូរមកហើយ ហើយសព្វថ្ងៃនេះសារៈសំខាន់នៃបញ្ហានេះ គឺច្បាស់លាស់សម្រាប់ទាំងអស់គ្នា»  ដោយមិនបង្ហាញពីការឆ្លើយតបរបស់លោក Dobrindt ទេ។

លោក Sa'ar បានបន្ថែមថា លោក Dobrindt បានជួបជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu កាលពីថ្ងៃអាទិត្យ ដើម្បីពិភាក្សាអំពីកិច្ចសហប្រតិបត្តិការលើបញ្ហាសន្តិសុខ និងបញ្ហាអ៊ីនធឺណិត និងកិច្ចខិតខំប្រឹងប្រែង ដើម្បីប្រយុទ្ធប្រឆាំងនឹងក្រុមប្រឆាំងជនជាតិ    ជ្វីហ្វ មុនពេលចុះហត្ថលេខាលើសេចក្តីថ្លែងការណ៍រួម។ 

ការអំពាវនាវនេះ កើតឡើង ចំពេលមានភាពតានតឹងក្នុងតំបន់កាន់តែខ្លាំងឡើង។ ទូរទស្សន៍ Al Araby ដែលមានមូលដ្ឋាននៅប្រទេសកាតា បានរាយការណ៍ថា មន្ត្រីអ៊ីស្រាអែលជឿថា សហរដ្ឋអាមេរិកអាចនឹងវាយប្រហារអ៊ីរ៉ង់ក្នុងពេលឆាប់ៗនេះ ដែលការតវ៉ាទូទាំងប្រទេសនេះកំពុងបន្ត។ របាយការណ៍នេះ បានលើកឡើងពីមន្ត្រីសន្តិសុខអ៊ីស្រាអែល ដោយនិយាយថា យោធាអ៊ីស្រាអែលបានបង្កើនកម្រិតប្រកាសអាសន្ន និងពង្រឹងការការពារដែនអាកាស ដើម្បីត្រៀមខ្លួនសម្រាប់ការឆ្លើយតបរបស់អ៊ីរ៉ង់ដែលអាចកើត  មាន៕