ប្រធានគោលនយោបាយការបរទេសសហភាពអឺរ៉ុប លោកស្រី Kaja Kallas បាននិយាយថា លោកស្រីបានត្រៀមខ្លួនរួចជាស្រេច ដើម្បីស្នើទណ្ឌកម្មថ្មីប្រឆាំងនឹងអ៊ីរ៉ង់។

យោងតាមលោកស្រី Kallas បានឲ្យដឹងថា សហភាពអឺរ៉ុប «បានដាក់ទណ្ឌកម្មយ៉ាងទូលំទូលាយប្រឆាំងនឹងអ៊ីរ៉ង់រួចហើយ ជាពិសេសប្រឆាំងនឹងអ្នកដែលទទួលខុសត្រូវចំពោះការរំលោភសិទ្ធិមនុស្ស ការពង្រីកកម្មវិធីនុយក្លេអ៊ែរ និងការគាំទ្ររបស់ទីក្រុងតេអេរ៉ង់ចំពោះប្រតិបត្តិការយោធាពិសេសរបស់រុស្ស៊ី នៅអ៊ុយក្រែន»។

លោកស្រីបានប្រាប់សារព័ត៌មាន Die Welt ថា៖«ខ្ញុំត្រៀមខ្លួនរួចជាស្រេច ដើម្បីស្នើទណ្ឌកម្មបន្ថែម ដើម្បីឆ្លើយតបទៅនឹងការបង្ក្រាបយ៉ាងឃោរឃៅលើក្រុមបាតុករ»។ អ្នកការទូតរូបនេះ បានបន្ថែមថា អ៊ីរ៉ង់កំពុងជួបប្រទះនឹងបាតុកម្មធំបំផុត ក្នុងរយៈពេលប៉ុន្មានឆ្នាំចុងក្រោយនេះ។

យោងតាមទីភ្នាក់ងារសារព័ត៌មាន DPA វិធានការដំបូងទំនងជានឹងត្រូវអនុវត្តចំពោះអ្នកដែលទទួលខុសត្រូវចំពោះសកម្មភាពប្រឆាំងនឹងក្រុមបាតុករ ដែលអាចរួមបញ្ចូលទាំងរដ្ឋមន្ត្រីផងដែរ។ ការរឹតបន្តឹងទាំងនេះ អាចរួមបញ្ចូលការហាមឃាត់ការធ្វើដំណើរទៅកាន់ប្រទេសសហភាពអឺរ៉ុប និងការបង្កកទ្រព្យសម្បត្តិ។

នៅថ្ងៃទី ២៩ ខែធ្នូ ពាណិជ្ជករបានចាប់ផ្តើមការតវ៉ានៅទីក្រុងតេអេរ៉ង់ ដោយសារតែការធ្លាក់ចុះយ៉ាងខ្លាំងនៃអត្រាប្តូរប្រាក់រៀលអ៊ីរ៉ង់។ នៅថ្ងៃទី ៣០ ខែធ្នូ និស្សិតបានចូលរួមភាពចលាចលនោះ។ កុបកម្មបានរីករាលដាលដល់ទីក្រុងធំៗភាគច្រើន៕