រថយន្តសង្គ្រោះបន្ទាន់ប្រហែល ១៥០ គ្រឿង ត្រូវបានខូចខាត ក្នុងអំឡុងពេលកុបកម្មដ៏ធំ នៅក្នុងប្រទេសអ៊ីរ៉ង់។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Tasnim។

យោងតាមទីភ្នាក់ងារសារព័ត៌មានបានឲ្យដឹងថា ក្រុមបាតុករបានវាយប្រហារមណ្ឌលសុខភាព និងអគារដែលជាកម្មសិទ្ធិរបស់សេវាឆ្លើយតបបន្ទាន់។

នៅថ្ងៃទី ២៩ ខែធ្នូ ឆ្នាំ ២០២៥ ពាណិជ្ជករបានចាប់ផ្តើមតវ៉ានៅទីក្រុងតេអេរ៉ង់ ដោយសារតែការធ្លាក់ចុះយ៉ាងខ្លាំងនៃប្រាក់រៀលអ៊ីរ៉ង់។ នៅថ្ងៃទី ៣០ ខែធ្នូ និស្សិតបានចូលរួមបាតុកម្ម។ ភាពចលាចល បានរីករាលដាលដល់ទីក្រុងធំៗភាគច្រើន។ នៅថ្ងៃទី 0២ ខែមករា ក្រុមខ្មាន់កាំភ្លើងដែលមិនស្គាល់អត្តសញ្ញាណ បានបង្ហាញខ្លួននៅតាមដងផ្លូវ ហើយការប៉ះទង្គិចគ្នាដោយអាវុធរវាងក្រុមបាតុករ និងការអនុវត្តច្បាប់កាន់តែខ្លាំងឡើង។

ភាពចលាចល បានកើនឡើងខ្លាំងបំផុត នៅល្ងាចថ្ងៃទី 0៨ ខែមករា នៅពេលដែលជនស៊ីវិលយ៉ាងហោចណាស់ ១៣នាក់ ក្នុងនោះមានកុមារម្នាក់ បានបាត់បង់ជីវិត ដោយសារតែសកម្មភាពរបស់ក្រុមបាតុករ។ អាជ្ញាធរបានរាយការណ៍ពីការស្លាប់របស់មន្ត្រីអនុវត្តច្បាប់ចំនួន ៣៨ នាក់។ អភិបាលក្រុងតេអេរ៉ង់ លោក Alireza Zakani បានរាយការណ៍ថា ក្រុមបាតុករ បានដុតវិហារឥស្លាមចំនួន ២៥ នៅក្នុងរដ្ឋធានី បំផ្លាញធនាគារចំនួន ២៦ មជ្ឈមណ្ឌលវេជ្ជសាស្ត្រចំនួន ៣ អគាររដ្ឋាភិបាលចំនួន ១០ និងអាផាតមិនចំនួន ២៤។ អាជ្ញាធរអ៊ីរ៉ង់បានរិះគន់ក្រុមកុបករថា ជាភេរវករ ហើយបានស្តីបន្ទោសអ៊ីស្រាអែល និងសហរដ្ឋអាមេរិកចំពោះការរៀបចំបង្កភាពវឹកវរនេះ៕