ប្រធានាធិបតីអាមេរិក លោក Donald Trump បាននិយាយថា ថ្នាក់ដឹកនាំអ៊ីរ៉ង់ ដែលដឹកនាំដោយមេដឹកនាំកំពូល លោក Seyyed Ali Hosseini Khamenei បានទូរស័ព្ទទៅលោកស្វែងរក «ការចរចា» បន្ទាប់ពីរូបលោកបានគំរាមចាត់វិធានការផ្នែកយោធា ក្នុងអំឡុងពេលមានការតវ៉ាប្រឆាំងរដ្ឋាភិបាលទ្រង់ទ្រាយធំ នៅក្នុងសាធារណរដ្ឋឥស្លាម។

នៅលើយន្តហោះ Air Force One កាលពីថ្ងៃអាទិត្យ (ទី១១ ខែមករា ឆ្នាំ២០២៦) លោក Trump បានប្រាប់អ្នកសារព័ត៌មានថា «ថ្នាក់ដឹកនាំអ៊ីរ៉ង់ បានទូរស័ព្ទមកកាលពីម្សិលមិញ (ថ្ងៃសៅរ៍)» ដោយលោកបានបន្ថែមថា «កិច្ចប្រជុំមួយកំពុងត្រូវបានរៀបចំឡើង។ ពួកគេចង់ចរចា»។ តែទោះជាយ៉ាងណាក្ដី មេដឹកនាំអាមេរិក បានបញ្ជាក់ថា៖ «យើងអាចនឹងត្រូវចាត់វិធានការ មុនមានកិច្ចប្រជុំមួយ»។

លោក Trump បាននិយាយថា៖ «អ្វីៗកំពុងចាប់ផ្តើមហើយ វាហាក់ដូចជា និងមានមនុស្សមួយចំនួន ត្រូវបានសម្លាប់ ដែលពួកគេមិនគួរត្រូវបានសម្លាប់សោះឡើយ។ មិនគួរមានអំពើហិង្សាកើតឡើងទេ ប្រសិនបើអ្នកហៅពួកគេថា មេដឹកនាំ។ ខ្ញុំមិនដឹងថា តើពួកគេជាមេដឹកនាំ ឬថា តើពួកគេគ្រាន់តែគ្រប់គ្រងតាមរយៈអំពើហិង្សា»។ សម្ដីរបស់លោកនេះកើតមានឡើងតែប៉ុន្មានថ្ងៃបន្ទាប់ពីរដ្ឋបាលរបស់លោក បានការពារភ្នាក់ងារអនុវត្តច្បាប់អន្តោប្រវេសន៍ និងគយ (ICE) របស់អាមេរិក ដែលបានសម្លាប់ស្ត្រីអាយុ ៣៧ឆ្នាំម្នាក់ នៅក្នុងរថយន្តរបស់នាង។

មេដឹកនាំអាមេរិករូបនេះ បានបន្ថែមថា យោធាអាមេរិកកំពុងតាមដានស្ថានការណ៍យ៉ាងដិតដល់។ លោកបានសង្កត់ធ្ងន់ថា៖ «យើងកំពុងពិនិត្យមើលវាយ៉ាងយកចិត្តទុកដាក់។ យោធាកំពុងពិនិត្យមើលវា ហើយយើងកំពុងពិនិត្យមើលជម្រើសដ៏រឹងមាំមួយចំនួន។ យើងនឹងធ្វើការសម្រេច»។

គួរបញ្ជាក់ថា អ៊ីរ៉ង់បានជួបប្រទះនឹងរលកនៃភាពចលាចលម្តងហើយម្តងទៀត ក្នុងរយៈពេលប៉ុន្មានសប្តាហ៍ថ្មីៗនេះ។ ប្រជាជនអ៊ីរ៉ង់រាប់ពាន់នាក់ កំពុងតវ៉ាប្រឆាំងនឹងរបបបច្ចុប្បន្ននៅក្នុងទីក្រុងនានាទូទាំងប្រទេស៕