នាវារុករករ៉ែ ១គ្រឿងរបស់ជប៉ុន បានចេញដំណើរហើយ នៅថ្ងៃចន្ទ (ទី១២ ខែមករា ឆ្នាំ២០២៦) នេះ ទៅកាន់កោះដាច់ស្រយាលមួយ ដើម្បីស្វែងរកភក់សម្បូរដោយរ៉ែកម្រ ដែលជាផ្នែកមួយនៃកិច្ចប្រឹងប្រែងរបស់ទីក្រុងតូក្យូ ដើម្បីទប់ស្កាត់ការពឹងផ្អែកលើប្រទេសចិន សម្រាប់រ៉ែសំខាន់ៗ ខណៈដែលទីក្រុងប៉េកាំងរឹតបន្តឹងការផ្គត់ផ្គង់។

បេសកកម្មរយៈពេល ១ខែរបស់នាវាសាកល្បង Chikyu នៅជិតកោះ Minamitori ចម្ងាយប្រហែល ១.៩០០គីឡូម៉ែត្រ នៅភាគអាគ្នេយ៍នៃទីក្រុងតូក្យូ នឹងក្លាយជាការប៉ុនប៉ងលើកដំបូង នៅក្នុងពិភពលោក ដែលលើកយកដីល្បាប់រ៉ែកម្រពីបាតសមុទ្រជម្រៅ ៦គីឡូម៉ែត្រ មកលើនាវា។

ប្រទេសជប៉ុន មិនខុសពីសម្ព័ន្ធមិត្តលោកខាងលិចរបស់ខ្លួននោះដែរ បានកាត់បន្ថយការពឹងផ្អែកលើចិន សម្រាប់រ៉ែសំខាន់ៗ ក្នុងការផលិតរថយន្ត ស្មាតហ្វូន និងគ្រឿងយុទ្ធោបករណ៍ ជាកិច្ចខិតខំប្រឹងប្រែងមួយដែលបានក្លាយជាកិច្ចការបន្ទាន់ អំឡុងពេលមានជម្លោះការទូតជាមួយទីក្រុងប៉េកាំង។

ប្រធានគម្រោងដែលគាំទ្រដោយរដ្ឋាភិបាល គឺលោក Shoichi Ishii បានប្រាប់សារព័ត៌មាន Reuters ថា៖ «បន្ទាប់ពីមានការរៀបចំយ៉ាងរឹងមាំអស់រយៈពេល ៧ឆ្នាំ យើងអាចចាប់ផ្តើមការធ្វើតេស្តចុងក្រោយបានហើយ។ វាពិតជាធ្វើឲ្យរំជួលចិត្តណាស់»។

លោកបានបន្តថា៖ «ប្រសិនបើគម្រោងនេះទទួលបានជោគជ័យ វានឹងមានសារៈសំខាន់យ៉ាងខ្លាំង ក្នុងការធ្វើពិពិធកម្មការផ្គត់ផ្គង់ធនធានរ៉ែដ៏កម្ររបស់ប្រទេសជប៉ុន»។ ដោយលោកបានបន្ថែមថា ការទាញយករ៉ែសំខាន់ៗ ពីជម្រៅ ៦គីឡូម៉ែត្រក្រោមនីវ៉ូទឹកសមុទ្របែបនេះ នឹងក្លាយជាសមិទ្ធផលបច្ចេកវិទ្យាដ៏ធំមួយ។

កាលពីសប្តាហ៍មុន ប្រទេសចិនបានហាមឃាត់ការនាំចេញដែលមានគោលដៅសម្រាប់យោធាជប៉ុន ចំពោះទំនិញប្រើប្រាស់បានទាំងស៊ីវិល និងយោធា ក្នុងនោះរួមទាំងរ៉ែសំខាន់ៗមួយចំនួនផងដែរ។ សារព័ត៌មាន Wall Street Journal បានរាយការណ៍ថា ទីក្រុងប៉េកាំងក៏បានចាប់ផ្តើមរឹតបន្តឹងការនាំចេញរ៉ែកម្រទៅកាន់ជប៉ុនកាន់តែទូលំទូលាយផងដែរ៕