រដ្ឋមន្ត្រីការពារជាតិបែលហ្ស៊ិក កាលពីថ្ងៃអាទិត្យ (ទី១១ ខែមករា ឆ្នាំ២០២៦) បានប្រាប់សារព័ត៌មាន Reuters ថា អង្គការណាតូ (NATO) គួរតែចាប់ផ្តើមប្រតិបត្តិការនៅតំបន់អាក់ទិក ដើម្បីដោះស្រាយកង្វល់សន្តិសុខរបស់សហរដ្ឋអាមេរិក ដោយជំរុញឲ្យមានឯកភាពនៅក្នុងសម្ព័ន្ធភាពឆ្លងមហាសមុទ្រអាត្លង់ទិក ស្របពេលមានភាពមិនច្បាស់លាស់កាន់តែខ្លាំងឡើងរបស់អឺរ៉ុប អំពីការជំរុញរបស់ប្រធានាធិបតីអាមេរិក Donald Trump ដើម្បីឲ្យគ្រប់គ្រងតំបន់ Greenland។

លោក Theo Francken បាននិយាយនៅក្នុងបទសម្ភាសន៍តាមទូរស័ព្ទថា៖ «យើងត្រូវសហការ ធ្វើការជាមួយគ្នា ហើយបង្ហាញកម្លាំង និងឯកភាព»។ ដោយលោកបានបន្ថែមថា មានតម្រូវការ ដើម្បីធ្វើ «ប្រតិបត្តិការរបស់អង្គការណាតូ នៅចុងភាគខាងជើងនេះ»។

លោក Trump បាននិយាយកាលពីថ្ងៃសុក្រចុងសប្ដាហ៍កន្លងមកថា សហរដ្ឋអាមេរិកត្រូវការកាន់កាប់កោះ Greenland ដើម្បីរារាំងរុស្ស៊ី ឬចិន កុំឲ្យកាន់កាប់លើដែនដីនេះនាពេលអនាគត។

មន្ត្រីអឺរ៉ុបបានពិភាក្សាអំពីវិធីសាស្ត្រ ដើម្បីបន្ធូរបន្ថយក្ដីបារម្ភរបស់សហរដ្ឋអាមេរិក ពាក់ព័ន្ធនឹងសន្តិសុខ នៅជុំវិញកោះ Greenland ដែលជាដែនដីស្វយ័តរបស់ព្រះរាជាណាចក្រដាណឺម៉ាក។

ហើយលោក Francken បានលើកឡើងពីប្រតិបត្តិការ Baltic Sentry និង Eastern Sentry របស់អង្គការណាតូ ដែលរួមបញ្ចូលគ្នានូវកងកម្លាំងមកពីប្រទេសផ្សេងៗគ្នា ដោយមានយានដ្រូន ឧបករណ៍ចាប់សញ្ញា និងបច្ចេកវិទ្យាផ្សេងទៀត ដើម្បីត្រួតពិនិត្យដី និងសមុទ្រ ជាគំរូដែលអាចធ្វើទៅបានសម្រាប់ប្រតិបត្តិការ «Arctic Sentry»៕