ទីភ្នាក់ងារសារព័ត៌មានជាតិផ្លូវការរបស់ប្រទេសលីបង់ (NNA) បានរាយការណ៍ថា កងកម្លាំងអ៊ីស្រាអែលបានវាយប្រហារតាមអាកាសជាង ១០លើក កាលពីរសៀលថ្ងៃអាទិត្យលើភូមិ Kfar Hatta ក្នុងតំបន់ទន្លេ Litani ភាគខាងត្បូងប្រទេសលីបង់។

ការវាយប្រហារតាមអាកាសទាំងនេះ បានកើតឡើង បន្ទាប់ពីអ្នកនាំពាក្យយោធាអ៊ីស្រាអែល លោក Avichay Adraee បាននិយាយនៅលើប្រព័ន្ធផ្សព្វផ្សាយ X ថា អ៊ីស្រាអែលនឹងវាយប្រហារទីតាំងហេដ្ឋារចនាសម្ព័ន្ធយោធារបស់ក្រុមហេសបូឡា ក្នុងទីក្រុង Kfar Hatta «ឆាប់ៗនេះ»។ លោកបាននិយាយថា ការវាយប្រហារនេះ គឺមានបំណងរារាំងក្រុមហេសបូឡាពីការព្យាយាមបន្តសកម្មភាពរបស់ខ្លួន នៅទីតាំងនោះ។

លោក Adraee បានជំរុញឲ្យប្រជាជនជម្លៀសចេញ មុនការវាយប្រហារដែលបានគ្រោងទុក។ លោកបាននិយាយថា៖«ដើម្បីសុវត្ថិភាពរបស់អ្នក អ្នកត្រូវជម្លៀសចេញជាបន្ទាន់ ហើយផ្លាស់ទីយ៉ាងហោចណាស់ ៣០០ម៉ែត្រ»។

ការវាយប្រហារតាមអាកាសទាំងនោះ បានបណ្តាលឲ្យមានការបំផ្លិចបំផ្លាញយ៉ាងធ្ងន់ធ្ងរដល់អគារ នៅក្នុងតំបន់នេះ។ នេះបើយោងតាមទីភ្នាក់ងារសារព័ត៌មាន NNA។

កាលពីថ្ងៃអាទិត្យ អ៊ីស្រាអែលបានបើកការវាយប្រហារតាមអាកាសទ្រង់ទ្រាយធំលើតំបន់ជាច្រើន នៅភាគខាងត្បូងប្រទេសលីបង់ រួមទាំងទីក្រុង Jbaa និង Jezzine។ ពុំមានរបាយការណ៍ភ្លាមៗអំពីអ្នកស្លាប់ និងរបួសនោះទេ។

កងទ័ពអ៊ីស្រាអែលបានធ្វើការវាយប្រហារជាញឹកញាប់ នៅក្នុងប្រទេសលីបង់ ដោយអះអាងថា ពួកគេមានគោលបំណងបញ្ចប់ «ការគំរាមកំហែង» របស់ក្រុមហេសបូឡា ទោះបីជាមានបទឈប់បាញ់ដែលសម្របសម្រួលដោយសហរដ្ឋអាមេរិក និងបារាំងរវាងក្រុមហេសបូឡា និងអ៊ីស្រាអែល ដែលបានចូលជាធរមានចាប់តាំងពីថ្ងៃទី ២៧ ខែវិច្ឆិកា ឆ្នាំ ២០២៤ ក៏ដោយ៕