ជើងហោះហើរជាង ១០០ជើង នៅឯអាកាសយានដ្ឋាន ក្នុងទីក្រុង Frankfurt ត្រូវបានលុបចោលដោយសារតែមានព្រិលធ្លាក់ខ្លាំង និងស្ថានភាពអាកាសធាតុត្រជាក់ដ៏គ្រោះថ្នាក់។

ប្រតិបត្តិករអាកាសយានដ្ឋាន Fraport បានឲ្យដឹងនៅថ្ងៃចន្ទ (ទី១២ ខែមករា ឆ្នាំ២០២៦) នេះថា ជើងហោះហើរចំនួន ១០២ជើង ក្នុងចំណោម ១.០៥២ជើង ដែលត្រូវបានគ្រោងទុក សម្រាប់ថ្ងៃនេះ ត្រូវបានរងផលប៉ះពាល់ ហើយជើងហោះហើរដែលត្រូវបានលុបចោល អាចបន្តកើនឡើងពេញមួយថ្ងៃនេះ ដោយការរំខាននាពេលនេះ ត្រូវបានគេរំពឹងថា នឹងមានរហូតដល់ថ្ងៃត្រង់ តាមពេលវេលាម៉ោងក្នុងស្រុក (ត្រូវនឹងថ្ងៃ ១១:០០ ម៉ោងសកល)។

កាលពីថ្ងៃអាទិត្យ អ្នកទេសចររាប់ពាន់នាក់ បានជាប់ភ្លាមៗនៅភាគខាងជើងប្រទេសហ្វាំងឡង់ ដោយសារស្ថានភាពត្រជាក់ខ្លាំង ក៏បានបង្ខំឲ្យមានការលុបចោលជើងហោះហើរ នៅអាកាសយានដ្ឋាន Kittilä ផងដែរ។

យោងតាមការចុះផ្សាយរបស់សារប័ត៌មាន Yle ដែលជាប្រព័ន្ធផ្សព្វផស្កាយសាធារណៈជាតិរបស់ហ្វាំងឡង់ បានឲ្យដឹងថា សីតុណ្ហភាព នៅអាកាសយានដ្ឋានបានធ្លាក់ចុះដល់ដក ៣៧អង្សាសេ កាលពីព្រឹកថ្ងៃអាទិត្យ បន្ទាប់ពីមានអាកាសធាតុត្រជាក់ស្រដៀងគ្នាជាច្រើនថ្ងៃ ដែលធ្វើឲ្យលំបាកដល់ការយកទឹកកកចេញពីយន្តហោះ និងប្រតិបត្តិការផ្សេងទៀត។ 

គួរបញ្ជាក់ថា ព្រិលធ្លាក់ខ្លាំង ខ្យល់បក់ខ្លាំង និងផ្លូវមានពេញដោយទឹកកក បានធ្វើឲ្យការធ្វើដំណើរមានការលំបាកនៅក្នុងតំបន់មួយចំនួននៃទ្វីបអឺរ៉ុប។ ហើយនៅប្រទេសអាល្លឺម៉ង់ អ្នកដំណើររថភ្លើង នៅតែជួបនឹងការពន្យារពេល និងការលុបចោលរយៈពេលយូរ កាលពីថ្ងៃអាទិត្យ បន្ទាប់ពីប្រតិបត្តិកររថភ្លើង Deutsche Bahn បានបិទសេវាកម្មទាំងអស់នៅភាគខាងជើងនៃប្រទេស កាលថ្ងៃសុក្រ ដោយសារតែព្រិលធ្លាក់ខ្លាំង៕