រដ្ឋមន្ត្រីការបរទេសអ៊ីរ៉ង់ លោក Abbas Araghchi នៅថ្ងៃចន្ទ (ទី១២ ខែមករា ឆ្នាំ២០២៦) នេះ បានប្រាប់ឲ្យដឹងថា ការចរចាជាមួយសហរដ្ឋអាមេរិក នៅតែអាចកើតឡើងបាន ទោះបីជាទីក្រុងតេអេរ៉ង់ ប្រកាសថា ខ្លួនត្រៀមខ្លួនរួចជាស្រេចសម្រាប់ការមានសង្គ្រាមក៏ដោយ។

អំឡុងពេលថ្លែងទៅកាន់ឯកអគ្គរដ្ឋទូតបរទេស នៅទីក្រុងតេអេរ៉ង់ ដែលត្រូវបានចាក់ផ្សាយដោយទូរទស្សន៍រដ្ឋ លោក Araghchi បានសង្កត់ធ្ងន់ថា អ៊ីរ៉ង់មិនស្វែងរកការមានសង្គ្រាមនោះទេ ប៉ុន្តែត្រៀមខ្លួនរួចជាស្រេច ដើម្បីការពារខ្លួន។

លោក Araghchi បានបញ្ជាក់ថា៖ «សាធារណរដ្ឋឥស្លាមអ៊ីរ៉ង់ មិនកំពុងស្វែងរកការមានសង្គ្រាមនោះទេ ប៉ុន្តែត្រៀមខ្លួនរួចជាស្រេច សម្រាប់ការមានសង្គ្រាម។ យើងក៏ត្រៀមខ្លួនរួចជាស្រេច សម្រាប់ការចរចាដែរ ប៉ុន្តែការចរចាទាំងនេះ គួរតែកើតឡើងដោយភាពយុត្តិធម៌ ពោលគឺមានសិទ្ធិស្មើគ្នា និងផ្អែកលើការគោរពគ្នាទៅវិញទៅមក»។

ប្រធានាធិបតីអាមេរិក លោក Donald Trump បាននិយាយនៅមុននេះថា ថ្នាក់ដឹកនាំអ៊ីរ៉ង់ កំពុងស្វែងរកការចរចា បន្ទាប់ពីលោកបានគំរាមកំហែងធ្វើអន្តរាគមន៍ផ្នែកយោធា ដោយសារការដោះស្រាយជាមួយការតវ៉ានេះ។

ប្រទេសអ៊ីរ៉ង់ត្រូវបានរួបរឹតដោយការតវ៉ា ចាប់តាំងពីចុងខែធ្នូឆ្នាំមុន ជុំវិញស្ថានភាពសេដ្ឋកិច្ចកាន់តែអាក្រក់ទៅៗ។ ក្រុមសិទ្ធិមនុស្ស HRANA ដែលមានមូលដ្ឋាននៅសហរដ្ឋអាមេរិក បានរាយការណ៍ពីការស្លាប់អ្នកតវ៉ាចំនួន ៤៩០នាក់ និងបុគ្គលិកសន្តិសុខ ៤៨នាក់ ដោយមានមនុស្សជាង ១០.៦០០ នាក់ ត្រូវបានចាប់ខ្លួន តែយ៉ាងណាក្ដី មិនមានតួលេខប៉ាន់ប្រមាណជាផ្លូវការ អំពីចំនួនអ្នកស្លាប់ និងរបួសនោះទេ៕