ក្រុមសភាតំណាងរាស្ត្រដ៏ធំបំផុតរបស់ប្រទេសប៊ុលហ្គារី គឺគណបក្សកណ្តាល-ស្តាំនិយម GERB-SDS នៅថ្ងៃចន្ទ (ទី១២ ខែមករា ឆ្នាំ២០២៦) នេះ បានបដិសេធការស្នើពីប្រធានាធិបតី ក្នុងការឲ្យប្រឹងប្រែងបង្កើតរដ្ឋាភិបាលថ្មី ដោយការមិនទទួលយកនេះធ្វើឲ្យលទ្ធភាពអាចមានកាន់តែខ្ពស់ សម្រាប់ការបោះឆ្នោតមុនអាណត្តិនៅក្នុងរដ្ឋដ៏ក្រីក្របំផុតដែលជាសមាជិករបស់សហភាពអឺរ៉ុប (EU) មួយនេះ។

រដ្ឋាភិបាលចម្រុះរបស់លោកនាយករដ្ឋមន្ត្រី Rosen Zhelyazkov ដែលគាំទ្រដោយគណបក្ស GERB-SDS បានចុះចេញពីតំណែង កាលពីខែមុន បន្ទាប់ពីមានការតវ៉ាតាមដងផ្លូវអស់រយៈពេលជាច្រើនសប្តាហ៍ប្រឆាំងនឹងអំពើពុករលួយ និងច្បាប់ថវិកាថ្មីរបស់រដ្ឋ។

បើយោងតាមសេចក្ដីរាយការណ៍របស់ទីភ្នាក់ងារសារព័ត៌មានក្នុងស្រុក BTA បានឲ្យដឹងថា ស្របតាមរដ្ឋធម្មនុញ្ញ ប្រធានាធិបតីប៊ុលហ្គារី លោក Rumen Radev នៅថ្ងៃចន្ទនេះ បានស្នើជាផ្លូវការទៅកាន់លោក Zhelyazkov ឲ្យព្យាយាមបង្កើតរដ្ឋាភិបាលចម្រុះថ្មីមួយ។ តែសារព័ត៌មាននេះ បានឲ្យដឹងថា លោក Zhelyazkov បានប្រគល់ត្រលប់អាណត្តិនេះវិញភ្លាមៗ ពីព្រោះរូបលោកមិនមានការគាំទ្រគ្រប់គ្រាន់នៅក្នុងសភា ដើម្បីបង្កើតបានសំឡេងភាគច្រើនដែលមានស្ថិរភាព។

ហើយឥឡូវនេះ លោក Radev ត្រូវបានគេរំពឹងថា នឹងផ្តល់ឲ្យក្រុមដ៏ធំបំផុតទី២ គឺគណបក្សកំណែទម្រង់ PP-DB នូវឱកាសដឹកនាំប្រទេស ប៉ុន្តែក្រុមនេះក៏ទំនងជានឹងច្រានចោលការផ្តល់ជូននេះផងដែរ។ បន្ទាប់មក លោក Radev នឹងប្រគល់អាណត្តិនេះទៅឲ្យគណបក្សដែលលោកជ្រើសរើស ហើយប្រសិនបើគ្មានក្រុមណាមួយ អាចទទួលបានសំឡេងភាគច្រើននៅក្នុងសភាទេនោះ លោកនឹងរំលាយសភា ហើយប្រកាសការបោះឆ្នោតមុនអាណត្តិ ដែលជាការបោះឆ្នោតលើកទី៨ របស់ប៊ុលហ្គារី ក្នុងរយៈពេលត្រឹមតែ ៤ឆ្នាំប៉ុណ្ណោះ៕