ចក្រភពអង់គ្លេស បានប្រាប់ឲ្យដឹងថា ខ្លួននឹងអភិវឌ្ឍមីស៊ីលបាលីស្ទិកតាក់ទិកថ្មី ដើម្បីធ្វើឲ្យការការពារជាតិអ៊ុយក្រែនកាន់តែប្រសើរឡើង ដែលជាផ្នែកមួយនៃការបង្កើនការគាំទ្រដល់ប្រទេសនេះ នៅឆ្នាំ ២០២៦។

ក្រោមគម្រោង Project Nightfall ចក្រភពអង់គ្លេសបានចាប់ផ្តើមនូវដំណើរការផ្លូវការមួយ ដើម្បីអភិវឌ្ឍយ៉ាងឆាប់រហ័សនូវមីស៊ីលបាលីស្ទិកបាញ់ចេញពីដី សម្រាប់អ៊ុយក្រែន ដែលអាចផ្ទុកក្បាលគ្រាប់ទម្ងន់ ២០០គីឡូក្រាម និងធ្វើដំណើរបានចម្ងាយជាង ៥០០គីឡូម៉ែត្រ។ នេះបើយោងតាមក្រសួងការពារជាតិ បានឲ្យដឹងនៅក្នុងសេចក្តីថ្លែងការណ៍មួយ កាលពីថ្ងៃអាទិត្យ (ទី១១ ខែមករា ឆ្នាំ២០២៦)។

គំនិតផ្តួចផ្តើមនេះមានគោលបំណងលើកកម្ពស់ឧស្សាហកម្មការពារជាតិរបស់ចក្រភពអង់គ្លេស ដោយគាំទ្រដល់នវានុវត្តន៍ និងកំណើន ក៏ដូចជាការបង្កើនការគាំទ្រដល់អ៊ុយក្រែន នៅឆ្នាំ២០២៦ ក្នុងអំឡុងពេលមានសង្គ្រាមជាមួយរុស្ស៊ីនេះ។

ក្រសួងបានបញ្ជាក់បន្ថែមថា៖ «មីស៊ីល Nightfall នឹងមានសមត្ថភាពបាញ់ចេញពីយានយន្តជាច្រើនប្រភេទ ដោយបាញ់មីស៊ីលច្រើនគ្រាប់ជាបន្តបន្ទាប់យ៉ាងលឿនរហ័ស និងដកថយទៅវិញចេញពីតាំងក្នុងរយៈពេលតែប៉ុន្មាននាទី ដែលអាចឲ្យកងកម្លាំងអ៊ុយក្រែនវាយប្រហារគោលដៅយោធាសំខាន់ៗ មុនពេលកងកម្លាំងរុស្ស៊ីអាចឆ្លើយតបវិញបាន»។

កម្មវិធីនេះ ដែលមានតម្លៃខ្ពស់បំផុត ៨០០.០០០ផោន (១លានដុល្លារ) ក្នុងមីស៊ីល ១គ្រាប់ មានបំណងផ្តល់ឲ្យអ៊ុយក្រែននូវ «ជម្រើសវាយប្រហារចម្ងាយឆ្ងាយដ៏មានឥទ្ធិពលខ្លាំងក្លា និងចំណាយតិច ដោយមានការគ្រប់គ្រងការនាំចេញទៅបរទេសតិចតួចបំផុត»៕