មន្ត្រីបានបញ្ជាក់ឲ្យដឹងថា យ៉ាងហោចណាស់មាននគរបាលចំនួន ៦នាក់ បានបាត់បង់ជីវិត នៅថ្ងៃចន្ទ (ទី១២ ខែមករា ឆ្នាំ២០២៦) នេះ នៅក្នុងហេតុការណ៍បំផ្ទុះគ្រាប់បែកមួយ នៅភាគពាយព្យនៃប្រទេសប៉ាគីស្ថាន។

យោងតាមប្រព័ន្ធផ្សព្វផ្សាយក្នុងស្រុក Geo TV បានឲ្យដឹងថា គ្រាប់បែកនោះត្រូវបានបញ្ជាពីចម្ងាយ ហើយត្រូវបានបំផ្ទុះនៅជិតរថយន្តពាសដែក ១គ្រឿងរបស់នគរបាល នៅលើផ្លូវ Gomal Bazaar ក្នុងតំបន់Tank របស់ខេត្ត Khyber Pakhtunkhwa (KP)។

រដ្ឋមន្ត្រីក្រសួងមហាផ្ទៃ លោក Mohsin Naqvi បានថ្កោលទោសយ៉ាងខ្លាំង ចំពោះការវាយប្រហារនេះ ហើយបានគោរពវិញ្ញាណក្ខន្ធរបស់បុគ្គលិកនគរបាលទាំង ៦រូបដែលបានស្លាប់នេះ រួមទាំងមន្ត្រីយាមប៉ុស្តិ៍ម្នាក់ទៀត។

យោងតាមវិទ្យុប៉ាគីស្ថានដែលគ្រប់គ្រងដោយរដ្ឋ បានផ្សាយថា លោកនាយករដ្ឋមន្ត្រី Shehbaz Sharif បានបញ្ជាឲ្យមាន «ការស៊ើបអង្កេតជាបន្ទាន់» ជុំវិញហេតុការណ៍នេះ និងបានណែនាំថា អ្នកដែលទទួលខុសត្រូវគួរតែត្រូវបាននាំខ្លួនទៅកាត់ទោសឲ្យបានឆាប់បំផុត។

ចំណែកប្រធានាធិបតី លោក Asif Ali Zardari បានសម្ដែងនូវភាពសោកសៅ និងការសោកស្តាយ ចំពោះការបាត់បង់មន្ត្រីនគរបាលនេះ ហើយបានគោរពដល់ភាពក្លាហានរបស់ពួកគេ នៅក្នុងសេចក្តីថ្លែងការណ៍មួយដែលចែករំលែកនៅលើបណ្ដាញសង្គម X។

ជាមួយគ្នានេះដែរ លោក Naqvi បានបញ្ជាក់ថា នាយកដ្ឋានប្រឆាំងភេរវកម្ម បានទប់ស្កាត់ផែនការបង្កភេរវកម្ម នៅក្នុងតំបន់ Peshawar, Bannu និង Khyber របស់នេះខេត្ត ដែល «ភេរវករ» ៨នាក់ ត្រូវបានសម្លាប់៕