ក្រុមមន្រ្តីនិយាយថា មនុស្សយ៉ាងហោច ២០នាក់ ត្រូវបានសម្លាប់ ដោយសារសត្វដំរីព្រៃឈ្មោលមួយក្បាល ក្នុងរយៈពេល៩ថ្ងៃកន្លងមកនេះ នៅរដ្ឋភាគខាងកើត Jharkhand ប្រទេសឥណ្ឌា ហើយសត្វដំរីនេះ នៅមិនទាន់ចាប់បាននោះទេ ។

ករណីស្លាប់មនុស្សនេះដែរ បានកើតឡើងចន្លោះថ្ងៃទី ១ និងថ្ងៃទី ៩ ខែមករា នៅតំបន់ព្រៃ Chaibasa និងព្រៃ Kolhan ស្ថិតក្នុងស្រុក West Singhbhum ដែលជាផ្នែកមួយនៃព្រៃធំបំផុត Sal នៅអាស៊ី ។

ជម្លោះរវាងមនុស្ស និងសត្វដំរី ត្រូវបានរាយការណ៍ក្នុងតំបន់អស់រយៈពេលជាច្រើនឆ្នាំមកហើយ ក្នុងនោះក្រុមមន្រ្តី និងក្រុមស្រាវជ្រាវ បានភ្ជាប់វាទៅនឹងការថយចុះគម្របព្រៃឈើ ការបែងចែកទីជម្រក និងការកើនឡើងសកម្មភាពមនុស្សនៅជិតច្រករបៀងសត្វដំរី ។

ក្រុមមន្រ្តីនិយាយថា ប្រតិបត្តិការស្វែងរកសត្វដំរីទ្រង់ទ្រាយធំដោយមានការចូលរួមពីអនុរក្សព្រៃឈើជាង ១០០នាក់ កំពុងធ្វើឡើង ដើម្បីកំណត់ទីតាំងរបស់សត្វដំរី ។

លោក Kuldeep Meena គឺជាអនុរក្សព្រៃឈើមួយរូបនិយាយថា នេះគឺជាស្ថានភាពពុំធ្លាប់ដែលមានពីមុនមក ហើយវាគឺជាលើកដំបូងហើយដែលមានមនុស្សស្លាប់ច្រើនបែបនេះ ដោយសារតែដំរីឈ្មោលមួយក្បាលនៅក្នុងតំបន់ ។ លោកបន្តថា អាទិភាពបន្ទាន់របស់ពួកគេ គឺតាមចាប់ និងការបញ្ជូនវាឲ្យត្រឡប់ចូលទៅក្នុងព្រៃវិញដោយសុវត្ថិភាព ៕